Թուրքական Haberaktuel կայքէջի փոխանցմամբ` հացադուլի հետ կապված հայտարարությամբ է հանդես եկել 2009-ի դեկտեմբերի 11-ին Թուրքիայի ՍԴ-ի որոշմամբ փակված «Ժողովրդավարական հասարակություն» կուսակցության Իգդիրի նահանգային կառույցի նախկին ղեկավար Սուլեյման Քալքանը: Վերջինս մտահոգություն է հայտնել, որ թուրքական կառավարության խոսնակը հայտարարում է, որ ընտրություններում քրդերը Իգդիրն էլ վերցրեցին և հաստատվեցին Հայաստանի հետ սահմանին:
Քալքանը նշել է, որ իշխանությունները Իգդիրի ընտրված քուրդ քաղաքապետին և իր կուսակիցներին ռազմական հեղաշրջման նման շատ արագ ձերբակալեցին և բանտերը լցրեցին: Բանախոսը զգուշացրել է իշխող «Արդարություն և զարգացում» կուսակցությանը, որ քրդերը չեն հանդուրժելու իրենց դեմ իրականացվող ահաբեկչությունն ու ճնշումները: «Այս պահին հազարավոր քուրդ երեխաներ կան բանտերում: Մենք մեր բողոքն ենք հայտնում Էրդողանի կուսակցության կողմից քրդերի դեմ իրականացվող ցեղասպանության քաղաքականության դեմ»-նշել է Սուլեյման Քալքանը:
2010թ. հունվարի 21-ի առավոտյան ժանդարմերիայի ներկայացուցիչները Իգդիրի քաղաքապետի և նրա 10 կուսակիցների տներում խուզարկություններ են իրականացրել ու իրենց հետ տարել Իգդիրի քաղաքապետին: Ոերջինիս և նրա 7 կուսակիցների ձերբակալել են ՔԲԿ հետ կապ ունենալու մեղադրանքով: Այս ձերբակալությունը լուրջ լարվածություն առաջացրեց Իգդիրում: Տեղի ունեցան բախումներ Իգդիրի քրդերի և ադրբեջանցիների միջև:
Իգդիրի քաղաքապետ Մեհմեդ Նուրի Գյունեշն ընտրվել է 2009 թվականի մարտի 29-ի տեղական ինքնակառավարման մարմինների ընտրությունների արդյունքով։ Վերջինս, Թուրքիայի Հանրապետության ստեղծումից ի վեր, Իգդիրի առաջին քուրդ քաղաքապետն է։ Մինչ այդ, ադրբեջանական բնակչության գերակշիռ մեծամասնության պատճառով, քաղաքապետեր են ընտրվել ադրբեջանցիները։
