«21-րդ դարը բազմաթիվ հակամարտությունների եւ ահաբեկչությունների դար է: Մենք, անշուշտ, հարգանքով ենք վերաբերվում Ադրբեջանի տարածքային ամբողջականությանը: Այդպիսի խնդիրներ կան աշխարհի շատ երկրներում, սակայն դրանցից ոչ մեկը չի լուծվել: Միջազգային կազմակերպություններն այդ հարցում ոչ համարժեք, կեղծավոր դիրքորոշում ունեն: Ցավոք, միջազգային հասարակությունը նախընտրում է քաղցր սուտը, քան դառը ճշմարտությունը»,- նշել է Լիբերմանը:
Լիբերմանը նաեւ հայտարարել է, որ ինքն անարդյունավետ բանակցությունների կողմնակիցը չէ: «Եթե արդյունքներ չկան, ապա ինչի՞ համար են բանակցություններ տարվում»:
Իսրայելի արտաքին գերատեսչության ղեկավարը նշել է, որ Ադրբեջան կատարած այցի նպատակը քաղաքական և տնտեսական հարցերը քննարկելն է: Մասնավորապես՝ քննարկվելու է տնտեսական համագործակցության միջկառավարական հանձնաժողովի ստեղծման հարցը:
Լիբերմանն ընդգծել է, որ ադրբեջանա-իսրայելական կապերի զարգացման համար կան շատ ոլորտներ, Իսրայելը պատրաստվում է ընդլայնել համագործակցությունը նաև տնտեսական ոլորտում:
Երկու երկրների միջև, նրա խոսքով, կան շատ ընդհանուր գծեր, երկկողմանի հարաբերությունները նրանց միջև զարգանում են արագ տեմպերով:
«Ուրախալի է, որ և Ադրբեջանը և Իսրայելը համաշխարհային տնտեսական ճգնաժամից դուրս եկան առանց կորուստների: Մենք նախատեսում ենք ադրբեջանցի մասնագետների հետ համագործակցել տեղեկատվական տեխնոլոգիաների, կրթության և առողջապահության ոլորտներում: Պատրաստվում ենք զարգացնել էներգետիկայի ոլորտում ունեցած կապերը: Ադրբեջանն առաջարկում է էներգետիկական կարևոր նախագծեր: Հույս ունեմ, որ մինչև տարեվերջ կողմերը հստակ որևէ պայմանավորվածության կհասնեն էներգետիկայի ոլորտում համագործակցելու հարցում»,- ընդգծել է Լիբերմանը:
