Եվրոպայի Հայկական Միությունների Ֆորումը բաց նամակ է հղել Թուրքիայի արտգործնախարար Ահմեդ Դավութօղլուին: Ինչպես «Արմենպրես»-ին տեղեկացրել է ԵՀՄ Ֆորումի նախագահ Աշոտ Գրիգորյանը, նամակում, մասնավորապես, ասվում է.
«Մեծարգո պարոն նախարար: Հունվար ամսին Լոնդոնում Ձեր ունեցած ելույթների վերջում պատասխանելով մեր` Եվրոպայի Հայկական Միությունների Ֆորումի (ԵՀՄՖ) ներկայացուցչի հարցերին, Դուք երկու անգամ հայտարարել եք, որ Թուրքիան չի պատրաստվում վավերացնել հայ-թուրքական արձանագրությունները` քանի հայերը չեն հրաժարվում 1915 թվականի Հայոց ցեղասպանության հաստատման պահանջից և չեն պատրաստվում վերադարձնել Ադրբեջանին ղարաբաղյան պատերազմի ժամանակ արյունով ազատագրված տարածքները: Այսինքն, այն փաստը, որի վրա սևեռել էին ուշադրությունը Եվրոպայի և ողջ աշխարհի հայկական կազմակերպությունները, այն է, որ չնայած Հայաստանը հարգելով պայմանավորվածությունները չի ընդգրկել արձանագրություններում ոչ մի նախապայման, իսկ Թուրքիան` խախտելով պայմանավորվածությունը, փորձելու է ստեղծել նախապայմաններ և ցեղասպանության և երրորդ երկրի ու Հայաստանի միջև առկա խնդիրների շուրջ, այսօր ակնհայտ ճիշտ դուրս եկավ: Այսինքն` Թուրքիան չի պատրաստվում ապաշրջափակելու հայկական սահմանը և չի պատրաստվում, որպես նորմալ հարևան ու եվրոպական արժեհամակարգին հարող երկիր, ստեղծելու բարիդրացիական հարաբերություններ իր կարևոր հարևանի հետ ` լուծելով հարյուրամյա տարիների ընթացքում ստեղծված պրոբլեմները: Ընդ որում, Թուրքիան այսօր փորձում է հանդես գալ որպես ժողովրդավարության ուղի բռնած երկիր, որը մեծ ամբիցիաներ ունի իր տարածաշրջանում կարևորագույն դերակատարություններ իր վրա վերցնելու հարցում»:
Նամակում նաև ասվում է, որ մոտակա շաբաթների ընթացքում, եթե Թուրքիան չվավերացնի հայ-թուրքակական արձանագրությունները, ապա համաշխարհային հասարակությունը կտա իր օբյեկտիվ գնահատականը այդ փաստին, և Եվրոպայի հայկական կազմակերպություններն առավել մեծ ուժով կշարունակեն իրենց պայքարը Հայոց ցեղասպանության ճանաչման գործում` ընդգրկելով նորանոր երկրների և ընդլայնելով Հայոց ցեղասպանությունը ճանաչած երկրների աշխարհագրությունը: Ավելին, ԵՀՄՖ-ն կվերանայի իր որոշումը Եվրամիությանը Թուրքիայի անդամակցության հարցում և կտրուկ հանդես կգա այդ անդամակցությանը դեմ: «Հաշվի առեք, չնայած մենք քաջ գիտակցում ենք, որ սահմանի ապաշրջափակումը շատ ավելի ձեռնտու է Թուրքիային քան Հայաստանին, այնուամենայնիվ ողջունում ենք երկու հարևան երկրների նախագահների կատարած քայլերն այդ հարցում և դիմում ենք Ձեզ առաջարկությամբ` չխանգարելու, այլ խթանելու սկսված զարգացումները: Հույսով և հավատով սպասում ենք Թուրքիայի վարչապետի և ԱԳ նախարարի դրական քայլերին և տրված խոստումների կատարմանը»,- ասված է ԵՀՄ Ֆորումի մեզ տրամադրած նամակում:
|
