Արևմտյան ազդեցիկ հրատարակչություններից մեկի` Ադրբեջանի նախագահ Իլհամ Ալիևի հետ հարցազրույց ունենալու առաջարկին ի պատասխան Ադրբեջանի նախագահի վարչակազմը հրատարակչության աշխատակցին ասել է, որ Ի.Ալիևին չպետք է հարցեր տրվեն «դիկտատուրայի, կոռուպցիայի, մոնարխիայի, ժողովրդավարության, մարդու իրավունքների և ընտրությունների» մասին: Լրագրողին ազատ են թողել միայն Լեռնային Ղարաբաղի և արտաքին քաղաքականության մասին հարցերում: Արդյունքում օտարերկրյա լրագրողները գերադասել են հարցազրույց չվերցնել Ի.Ալիևից և հեռացել են Ադրբեջանից:
Տեղեկացնելով այդ մասին, «Ազադլըգ»-ը հարցադրել է. «Տեսնես, ի՞նչն է անհանգստացնում Ադրբեջանի իշխանությանը, որ տեղական մամուլին հարուցվող գրաքննությունը սկսել են տարածել նաև արտասահմանյան ԶԼՄ-ների վրա»: «Թուրան» տեղեկատվական գործակալության տնօրեն Մեհման Ալիևի խոսքերով, օտարերկրյա ԶԼՄ-երի նկատմամբ իշխանության նման վերաբերմունքը պատահական չէ: «Զգացվում է, որ Ադրբեջանի իշխանության մեջ վերջին ժամանակներում լարվածություն է առաջացել արտասահմանյան մամուլում ադրբեջանական պետությունը ժողովրդավարության ուղին բռնած երկիր չհամարելու և այդ հարցը արևմտյան մամուլում քննարկվելու հետ կապված: Պետության ղեկավարի՝ «Եվրոնյուզ»-ին տված հարցազրույցից հետո իշխանության մեջ լարվածությունն ավելի է աճել: Քանի որ, ադրբեջանական մամուլում, ԱզԹՎ-ում վիճակն այնպիսին է, որ հայտնի կարծիքները հնարավոր չէ խմբագրել: «Եվրոնյուզ»-ը, սակայն, հարցազրույցը հեռարձակել է այնպես, ինչպես եղել է:
Արևմտյան մամուլը շատ ժամանակ այնպիսի հարցադրումներ է անում, որ դրանց պատասխանելը դժվարանում է: Այդ պատճառով էլ, երևում է, արգելքը դրվել է նման իրավիճակներից խուսափելու համար», -ասել է Մ.Ալիևը: «Գյունդալիք Ազերբայջան» թերթի գլխավոր խմբագիր Շահվելեդ Չոբանօղլուն էլ հայտնել է, որ ադրբեջանական իշխանությունը խուսափում է օրակարգ բերել երկրում տիրող ժողովրդավարության հետ կապված թեման: «Իշխանությունն աշխատում է խուսափել «Եվրոնյուզ»-ին տված հարցազրույցում իրագործվող քաղաքականության բացահայտման նման իրավիճակների կրկնությունից: Իշխանությունը լավ գիտի, որ ազատ մամուլին նման հնարավորություն ընձեռնվելու դեպքում Ի.Ալիևին անպայման հարց է ուղղվելու երկրում տիրող ժողովրդավարության, խոսքի և մամուլի ազատության վիճակի մասին: Այդ պատճառով էլ նման հնարավարություն չի տրվում», -եզրահանգել է Շ.Չոբանօղլուն:
|
