«Հայ-չինական համաժողովը վկայում է այն մասին, որ մեր երկրների տնտեսական հարաբերությունները բավականին արագ տեմպերով են զարգանում, որի համար հիմք է ծառայում երկու ժողովուրդների միջև փոխադարձ վստահությունը»: Այս մասին այսօր հայ-չինական գործարար համաժողովի ժամանակ ասաց ՀՀ վարչապետ Տիգրան Սարգսյանը:
«Մենք մեծ ներուժ ենք տեսնում առևտրատնտեսական հարաբերությունները զարգացնելու ուղղությամբ: Դրան հասնելու համար կգործադրենք բոլոր ջանքերը, և կանենք առավելագույնը»,- նշեց Տ.Սարգսյանը:
Վարչապետը մեկ անգամ ևս նշեց, որ թեև հայ-չինական տնտեսական համագործակցությունը վերջին տարիներին բուռն զարգանում է, 2010թ.-ին երկու երկրների միջև առևտրաշրջանառությունը կազմել է 436 մլն դոլար, սակայն դա բավարար չէ, քանի որ Հայաստանի և Չինաստանի միջև համագործակցության մեծ պոտենցիալ կա: «Մենք պետք է անենք հնարավորինս, որպեսզի այդ համագործակցությունն էլ ավելի մեծանա»,- նշեց Տ.Սարգսյանը:
Ըստ նրա, Հայաստանը շահագրգռված է Չինաստանի հետ տարբեր ոլորտներում համագործակցությունը զարգացնելու ուղղությամբ: Մասնավորապես, լեռնահանքային, քիմիական արդյունաբերության, զբոսաշրջության, ենթակառուցվածքների, գյուղատնտեսության, տեղեկատվական տեխնոլոգիաների, կրթության ոլորտներում:
Չինաստանի կոմունիստական կուսակցության կենտրոնական կոմիտեի քաղաքական բյուրոյի մշտական անդամ Լի Չանչունը շնորհակալություն հայտնեց հայկական կողմին ջերմ ընդունելության համար, և նշեց, որ չնայած Հայաստանին և Չինաստանին հսկայական տարածություն է բաժանում, բայց երկու երկրների ժողովուրդները միշտ էլ ամուր կապեր են ունեցել միմյանց հետ: «Հայաստանն իր հարուստ պատմությամբ ապացուցում է, որ ունի տնտեսական մեծ ներուժ արտահանման ծավալները մեծացնելու, նոր ծրագրեր իրականացնելու ուղղությամբ: Չինաստանն ունի մեծ շուկա, Հայաստանը` որակյալ արտադրանք: Չնայած դրան` Հայաստանից մեր երկիր արտահանման ծավալները շատ փոքր են»,- նշեց Լի Չանչուն` հավելելով, որ Չինաստանի կառավարությունը պատրաստակամ է նպաստել Հայաստանից ներկրումներին, սակայն հայ գործարարները պետք է ավելի ակտիվ լինեն:
/Panorama.am/
|