ՀՀ նախագահ Սերժ Սարգսյանի գլխավորած պատվիրակությունը ժամանեց Թուրքմենստանի մայրաքաղաք Աշխաբադ: Ինչպես հայտնում է Aysor.am-ի թղթակիցը, Սափարմուրատ Նիյազովի անվան միջազգային օդանավակայանում ՀՀ նախագահին դիմավորեց Թուրքմենստանի նրա պաշտոնակից Գուրբանգուլի Բերդիմուհամեդովը:
Երկու երկրների օրհներգերը հնչելուց հետո նախագահներ Սարգսյանն ու Բերդիմուհամեդովը պատվո պահակախմբի ստուգայց կատարեցին, որից հետո ողջունեցին հայկական ու թուրքմենական պատվիրակությունների անդամներին:
Նշենք, որ Թուրքմենստան պաշտոնական այցի շրջանակներում ՀՀ նախագահին ուղեկցում են կառավարության անդամներ, ԱԺ պատգամավորներ, մի շարք բարձրաստիճան պաշտոնյաներ, այդ թվում` ՀՀ արտգործնախարար Էդուարդ Նալբանդյանը, էներգետիկայի և բնական պաշարների նախարար Արմեն Մովսիսյանը, կրթության և գիտության նախարար Արմեն Աշոտյանը, մշակույթի նախարար Հասմիկ Պողոսյանը, Սփյուռքի նախարար Հրանուշ Հակոբյանը, ԱԺ պատգամավորներ Աշոտ Արսենյանն ու Արմեն Մխիթարյանը:
Այցի շրջանակներում նախատեսված է նախագահների առանձնազրույց, ինչպես նաև պատվիրակությունների ընդլայնված կազմով հանդիպում: Այսօր երեկոյան Թուրքմենստանի նախագահի անունից ՀՀ նախագահ Սերժ Սարգսյանի պատվին պաշտոնական ընթրիք կմատուցվի:
/Aysor.am/
| 
