«Ադրբեջանի կողմից գերության մեջ զոհված ՀՀ քաղաքացու մարմնի հանձնումը գերի ընկած հայրենակցի փոխարեն սոսկ սիմվոլիկ էր»: Նման կարծիք է հայտնել քաղաքագետ, փիլիսոփայական գիտությունների դոկտոր, Երևանի պետական համալսարանի պրոֆեսոր Ալեքսանդր Մանասյանը: «Գերու փոխանցումը տեղի է ունեցել աստրախանյան պայմանավորվածության շրջանակներում, և այս ամենի մեջ որոշակի սիմվոլիկա կա: Մենք նրանց կենդանի մարդ տվեցինք, իսկ նրանք մեզ՝ դագաղով մարմին»,- «Նովոստի» միջազգային մամուլի կենտրոնում լրագրողներին ասաց Մանասյանը: Փորձագետը նաև նշեց, որ չկա ոչ մի երաշխիք, որ գերիների փոխանակման գործընթացը շարունակական կլինի: «Գործընթացը պետք է շարունակական լինի, ամեն դեպքում, դրա մասին պայմանավորվածություն է ձեռք բերվել Աստրախանում, չէ՞ որ երեք նախագահներ չէին հավաքվել մի գերու հարցով: Սակայն համոզմունք չկա, որ Ադրբեջանը չի խախտի պայմանավորվածությունը, նա անհուսալի գործընկեր է», – ասաց նա: Ինչպես տեղեկացնում է «Նովոստի-Արմենիա»-ն, փորձագետը նաև նշել է, որ հանձնումը պետք է տեղի ունենա գերու ցանկությամբ, և Կարմիր խաչի միջազգային կոմիտեն պետք է դա հաշվի առնի: Հիշեցնենք, որ Երևանը հինգշաբթի Բաքվին է հանձնել նախորդ տարվա դեկտեմբերի վերջին հայկական սահմանն անօրինական հատած Ադրբեջանի քաղաքացի Հելդար Տագիևին՝ փոխարենը ստանալով ադրբեջանական գերության մեջ կասկածելի հանգամանքներում զոհված հովիվ Մանվել Սարիբեկյանի մարմինը: Փոխանցումը տեղի է ունեցել ի կատարումն 2010 թ.-ի հոկտեմբերի 27-ին Աստրախանում Հայաստանի, Ադրբեջանի և Ռուսաստանի նախագահների միջև ստորագրված համաձայնագրի՝ Կարմիր Խաչի Միջազգային Կոմիտեի միջնորդությամբ:
/Times.am- Հայաստանի լուրեր/
|