«Ադրբեջանի արած հայտարարությունից հետո իրենցից շատերը փոշմանեցին, քանի որ առաջին հերթին տեխնիկապես դժվար է լեռնային հարթավայրից թռչող ինքնաթիռ խոցելը: Ռազմական հատկանիշների վերլուծությամբ` լեռնային պարագայում ցանկացած համակարգ դժվար է խոցել. մեր ունեցած դիրքը նրանցը թույլ չի տալիս, որ տեխնիկական միջոցները գործեն Արցախի տարածքում` թեկուզ միայն հակահարվածի վտանգից ելնելով»,-այսօր լրագրողների հետ հանդիպմանն` անդրադառնալով ադրբեջանական կողմի` Երևան-Ստեփանակերտ չվերթի ինքանթիռնեը ոչնչացնելու մասին հայտարարություններին, նման մեկնաբանությամբ հանդես եկավ քաղաքագետ Հրանտ Մելիք-Շահնազարյանը:
Բանախոսը հիշեցրեց 1992թ-ը, երբ պատերազմի ընթացքում ադրբեջանական կողմը խոցեց 3 հայկական քաղաքացիական ինքնաթիռ: Խոցված ինքնաթիռներից մեկը կործանվեց, մյուս երկուսը վթարային վայրէջք կատարեցին: «Երեք ինքնաթիռներն էլ խոցվել էին ռազմական միջոցներով, և պետք չէ հավաստել, թե դա հումանիստական խախտում էր: Ադրբեջանական կողմին զսպող ներքին շապիկ չի եղել ու չի լինի, բայց վախի ու զսպվածության զգացողություն կա արտաքին ուժերի կողմից»,- ասաց Հրանտ Մելիք-Շահնազարյանը` հավելելով, որ Ադրբեջանի կողմից արված հերթական քայլը նպատակ ուներ ստուգել հակամարտող կողմի տրամադրությունը:
Ասուլիսի մասնակից ռազմական փորձագետ Արծրուն Հովհաննիսյանն էլ փաստեց, որ քաղաքացիական ինքնաթիռ խոցելու սպառնալիքն արդեն իսկ տեղեկատվական ահաբեկչության փաստ է: «Իրականում Ադրբեջանը կարողացել է ներազդել հասարակության վրա: Բայց Հայաստանի նախագահի հայտարարությամբ փոխվեց վերաբերմունքը: Ինձ ամեն օր Արցախից հազարավոր մարդիկ են զանգում ու հարցնում, թե ինչպես կարող են ձեռք բերել այդ չվերթի տոմսերից»,- ասաց Ա.Հովհաննիսյանը:
Նրա խոսքով, պետք է ադրբեջանական կողմի այդ հայտարարության հետ կապված բանաձևեր մշակել, լոբինգ իրականացնել, զեկույցների պատրաստել, որ միջազգային կառույցներն էլ իրենց ձայնը բարձրացնեն:
/Panorama.am/
|