Блог
Главная »
2011 » Апрель » 7 » Օշականում շուտով կբացվի ռուս զինվորների հիշատակին նվիրված հուշահամալիր
15:52 Օշականում շուտով կբացվի ռուս զինվորների հիշատակին նվիրված հուշահամալիր |
Հայաստանում Ռուսաստանի դեսպան Վյաչեսլավ Կովալենկոն այսօր ծանոթացել է 1827-ին Օշականի ճակատամարտում զոհված ռուս զինվորների հիշատակին նվիրված հուշահամալիրի վերականգնման աշխատանքներին: Այդ մասին տեղեկացնում են հայ-ռուսական բարեգործական «Պատվի գործ» կազմակերպության լրատվական ծառայությունից: Օշականի հուշահամալիրը դեսպանը համարել է հայ և ռուս ժողովուրդների դարավոր բարեկամության խորհրդանիշերից մեկը:
Աշխատանքների ընթացքը դեսպանին ներկայացրել է կազմակերպության նախագահ Անդրանիկ Նիկողոսյանը: Վերջինն, իր հերթին, շնորհակալություն է հայտնել Էջմիածնի քաղաքապետ Կարեն Գրիգորյանին` հուշահամալիրի բարեկարգման ընթացքում ցուցաբերած աջակցության համար:
Օշականի ճակատամարտը Ռուս-պարսկական պատերազմի հերոսական էջերից է: 1827թ. օգոստոսի 17-ին պարսից շահ Աբբաս Միրզայի զորքերը պաշարել էին Էջմիածինը, որի փրկությանն էր շտապում ռուսական զորախումբը` Ա. Կրասովսկու գլխավորությամբ: Պարսիկները ճակատամարտը տանուլ տվեցին: Որոշում ընդունվեց Օշականում ռուս զինվորների հիշատակը հավերժացնող հուշահամալիր կանգնեցնել, որի բացումը կայացավ 1834թ.: Մեր օրերում Օշականի հուշահամալիրը հայտնվել էր անմխիթար վիճակում: «Օշականի հուշահամալիրի վերածնունդ» ծրագրի շրջանակներում նախատեսվում է դրան նոր շունչ հաղորդել:
Սա «Պատվի գործ» կազմակերպության երկրորդ լայնամաշտաբ ծրագիրն է: Առաջինը` Գյումրիում Պատվո Բլրի բարեկարգումն էր: Հուշահամալիրի բացումը տեղի ունեցավ անցյալ տարվա օգոստոսին` Ռուսաստանի եւ Հայաստանի նախագահների մասնակցությամբ: Օշականի հուշահամալիրի հանդիսավոր բացման արարողության օրվա մասին կհայտնվի մոտակա օրերին:
/Panorama.am/
|
|
Просмотров: 522 |
Добавил: Voskanapat
| Рейтинг: 0.0/0 |
