Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի օրհնությամբ Մայր Աթոռ Սուրբ Էջմիածնի Հրատարակչական բաժինը լույս է ընծայել հետևյալ աշխատությունները`
ա. «Ավետարանների գրպանի հունարեն-գրաբար բառարան»: Մարիաննա Ապրեսյանի պատրաստած բառարանը նախատեսված է Ս. Գրքի թարգմանական և մեկնողական հարցերով զբաղվողների, ուսանողների, հոգևորականության և հայագիտական լայն շրջանակների համար: Գիրքը հրատարակվել է մեկենասությամբ տեր և տիկին Վլադիմիր Ենգիբարյանի և Բելա Ժամգարյանի:
բ. «Գիրք աղոթից, որ կոչի Կիպրիանոս» աղոթագրքերի շարքի Գ հատորը: Հայերեն առաջին տպագիր գիրքը` Ուրբաթագիրքը, աղոթքների ժողովածու լինելով, բազմիցս վերահրատարակվել է տարբեր անուններով` «Գիրք աղոթից» (Կ. Պոլիս, 1799), «Ակն հոգեկան» (Ս. Էջմիածին, 1683), «Աղօթագիրք» (Կ. Պոլիս, 1798) և այլն: Որոշ հայագետներ այդ աղոթագրքերին տվել են նաև «Կիպրիանոս անունը», և վերջին ժամանակներում դրանք վերահրատարակվել են «Գիրք աղօթից որ կոչի ԿԻՊՐԻԱՆՈՍ վասն ամենայն ազգ պատահարաց, որք գան ի վերայ մարդոյ» կամ «Աղօթագիրք Կիպրիանոս, որ կոչի նաև ՀԱԶԱՐ և ՄԵԿ ԱՆՈՒՆ» վերնագրերով:
Ինչպես հայտնում են Մայր Աթոռ Ս.Էջմիածնի տեղեկատվական համակարգից, սույն աղոթագիրքը 1953թ. Երուսաղեմում տպագրված «Կիպրիանոս» աղոթագրքի վերահրատարակությունն է` կատարված «Սարգիս Գաբրիելյան» հիմնադրամի մեկենասությամբ:
գ. Նախածերենցյան հայսմավուրքային վեց խմբագրությունների Համաբարբառ Հայսմավուրքի` դեկտեմբեր ամսվա հատորը: Աշխատությունը հրատարակվել է «Սարգիս Գաբրիելյան» հիմնադրամի հովանավորությամբ:
/Aysor.am/
| 
