Այսօր կառավարության նիստի մեկնարկին վարչապետ Տիգրան Սարգսյանը արտասանել է հայ գրող Հովհաննես Շիրազի տողերը. «Մի կյանք արժե մի համբույրը աղջկա, Առանց կնոջ, առանց սիրո կյանք չկա …» և շնորհավորել հայ կանանց մայրության տոնի կապակցությամբ:
Այնուհետև սկսվել է նիստի պաշտոնական մասը: Մասնավորապես վարչապետը անդրադառնալով պետական ծառայությունների որակին, հայտարարել է, որ Հայաստանի կառավարությունը պարտավոր է օպերատիվ միջոցառումներ իրականացնւի, որպեսզի ծառայությունների որակը լինի բարձր, և կոռուպցիոն ռիսկերը հասցնենք նվազագույնի։ Եվ որպես առաջին քայլ գործադիրի ղեկավարը մատնանշել է տեխնիկական զննման գործընթացը: «Կարծում եմ, պարոն Վարդանյան, անհրաժեշտություն կա ավելի լայն լուսաբանել կառավարության այս որոշումը, որպեսզի մեր քաղաքացիները հասկանան, որ այս որոշման արդյունքում այն 5000 դրամ շորթումը, որ տեղի էր ունենում, այլևս չպետք է տեղի ունենա։ Դրա համար մենք վերացրել ենք բոլոր հիմքերը, որովհետև կառավարության որոշումով այսուհետև տեխնիկական զննում իրականացնող կազմակերպություններն իրենք պետք է շահագրգռված լինեն բարձր որակի ծառայություն մատուցել, որպեսզի քաղաքացիներն ընտրեն հենց իրենց ծառայությունը։ Սա առաջին քայլն էր, որ մենք ձեզ հետ միասին արել ենք», -հավելել է Սարգսյանը։
Հաջորդ քայլերը, ըստ վարչապետի, նվիրված են լինելու նախագահ Սերժ Սարգսյանի կողմից ոստիկանության հետ հանդիպման ժամանակ բարձրացրած խնդիրներին։ «Մասնավորապես, Հանրապետության Նախագահի հանձնարարականով մենք մոտակա շաբաթների ընթացքում ձեզ հետ միասին անդրադառնալու ենք մեքենաների գրանցման և վարորդական իրավունքների տրամադրման գործընթացներին, որտեղ առկա են լուրջ կոռուպցիոն ռիսկեր, և պարտավոր ենք այստեղ թափանցիկություն ապահովել, և պետական այն գործառույթները, որոնք այդ կոռուպցիոն ռիսկերն ստեղծում են, պետք է վերացնենք», -հայտարարել է նա։
Այնուհետև, վարչապետի ներկայացմամբ, կադաստրում ու քաղաքացիական ակտերի գրանցման գրասենյակներում բարեփոխումներ կիրականացվեն, որտեղից նրա խոսքով, նույնպես դժգոհություններ կան, ինչպես նաև` կոռուպցիոն ռիսկեր:
«Մենք ձեզ հետ միասին անդրադարձել ենք անձնագրերի տրամադրման գործառույթներին, որտեղ առկա են լուրջ կոռուպցիոն ռիսկեր։ Մեր վերջին մոնիտորինգի արդյունքները վկայում են այն մասին, որ այսօր կոռուպցիան այդ բնագավառում իսպառ բացակայում է։ Նշանակում է` երբ կառավարությունը համապատասխան որոշումներ է ընդունում, կարգերը պարզեցնում է, դարձնում է թափանցիկ, մենք կարողանում ենք հասնել հաջողության, և իմ կողմից թվարկված ոլորտներում նույնպես մենք կարճ ժամանակահատվածում պետք է հասնենք նույն արդյունքներին, ինչին մենք հասանք անձնագրերի տրամադրման գործընթացը կանոնակարգելու պարագայում», -հավելել է գործադիրի ղեկավարը։
/Panorama.am/
|