«Նոյեմբերի 7-ին Ադրբեջանում տեղի ունեցած խորհրդարանական ընտրությունները հերթական անգամ ապացուցեցին, որ այդ երկրում ժողովրդավարությունը ոտնահարված է: Միջազգային դիտորդները, բացառությամբ ԱՊՀ առաքելության, արձանագրել են ընտրական օրենսգրքի բազմաթիվ խախտումներ»,- այս մասին ԼՂՀ ԱԺ պատգամավորական հայտարարության ժամին «Ժողովրդավարություն» խմբակցության անունից հայտարարել է ԼՂՀ ԱԺ պատգամավոր, արտաքին հարաբերությունների մշտական հանձնաժողովի նախագահ Վահրամ Աթանեսյանը:
Նրա խոսքերով՝ այդ դիտարկումների խտացված պատկերը ներկայացրեց ԱՄՆ Պետդեպարտամենտը` հայտարարելով, որ «Ադրբեջանում խորհրդարանական ընտրությունները չեն համապատասխանել միջազգային չափանիշներին»:
«Գործնականում դա հավասարազոր է նրան, որ Միացյալ Նահանգների կառավարությունը, ինչպես նաև միջազգային մի շարք կազմակերպություններ չեն ճանաչում քվեարկության արդյունքները և դրանք համարում են կեղծված: Կարելի է փաստել, որ նման գնահատականի համար բավարար հիմքեր ստեղծել է ադրբեջանական ժողովուրդը, որը զանգվածաբար չի մասնակցել քվեարկությանը: Ցուցակներում գրանցված քաղաքացիների կեսը չի ներկայացել ընտրատեղամասեր: Դա նշանակում է, որ հանրությունը որևէ վստահություն չի ունեցել, թե իր քվեարկությունից է կախված ապագա խորհրդարանի կազմի ընտրությունը:
Երևույթը պետք է համարել լուռ բողոքի արտահայտություն, ինչը խոսում է Ադրբեջանում իշխող քաղաքական նիհիլիզմի և իշխանությունների հանդեպ ատելության մասին»- նշել է Վ. Աթանեսյանը:
ԼՂՀ ԱԺ պատգամավորի համոզմաբ՝ այս իրավիճակում օրախնդիր է դառնում, որպեսզի միջազգային հանրությունը, ի դեմս ԵԱՀԿ Մինսկի խմբի համանախագահության, գործնականում լեգիտիմացնի Լեռնային Ղարաբաղի Հանրապետության հետ իր շփումները և առաջ մղի ժողովրդավարական ու իրավական ԼՂՀ փաստացի անկախությունը ճանաչելու գործընթաց:
«Խորհրդարանական տապալված և միջազգային հանրության համար խիստ կասկածելի ընտրություններով Ադրբեջանը փաստորեն առկա խնդիրների կարգավորման այլ հնարավորություն չի թողնում»,- նշել է արցախցի պատգամավորը: /Aysor.am/
| 
