Այսօր ՀՀ Կառավարությունն Ազգային ժողով է ուղարկել «ՀՀ Քրեական օրենսգրքում փոփոխություններ ու լրացումներ կատարելու մասին» օրինագիծը, որով առաջարկվում է որոշ հանցատեսակների համար փոխել պատժաչափը և ազատազրկման վերին սահման ամրագրել 20 տարին՝ ներկայիս 15 տարվա փոխարեն: Օրինագծի հեղինակը ՀՀ գլխավոր դատախազությունն է:
Ազգային ժողովի սեպտեմբերի 14-ի նիստում օրինագծի քննարկումը հետաձգվել էր` ուղարկվելով լրամշակման` 60 –օրյա ժամկետով: Այս մասին տեղեկացնում է ԱԺ-ի պաշտոնական կայքէջը: Լրամշակման ժամկետն ավարտվել էր նոյեմբերի 15-ին, բայց օրինագիծը դեռ հետ չէր ուղարկվել ԱԺ:
Օրինագծի հիմնական նպատակն է` մեղմել գործող պատժաչափերը: Նախատեսվում է փոփոխություններ կատարել քրեական օրենսգրքի 59-րդ հոդվածի 2-րդ և 4-րդ մասերում, 66-րդ հոդվածի 4-րդ մասում և 67-րդ հոդվածի 3-րդ մասում, այսինքն՝ ազատազրկման առավելագույն ժամկետ սահմանել 20 տարին, հանցագործությունների համակցությամբ պատիժ նշանակելիս ազատազրկման առավելագույն ժամկետ սահմանել 22 տարին, իսկ դատավճիռների համակցության դեպքում` 25 տարին:
Հիշեցնենք, որ պետական կառույցների հետ համագործակցության «Հանրային ցանց»-ի կողմից անցկացված փորձաքննության արդյունքների համաձայն` փոփոխությունները նպաստելու են քրեական օրենսգրքի լիբերալիզացմանն ու հումանիզացմանը։
«Հանրային ցանցի» հրապարակած եզրակացության մեջ նշված է` «Ըստ քրեական օրենսգրքի 13-րդ հոդվածի` անձի վիճակը բարելավող օրենքի փոփոխությունները հետադարձ ուժ ունեն: Հետևաբար, նախագծի՝ ԱԺ-ի կողմից ընդունվելուց և օրենք ուժ ստանալուց հետո բոլոր այն դրույթները, որոնցով նախատեսված է հանցագործությունների սանկցիաների նվազեցում, հետադարձ ուժ կունենան»:
Այսինքն` կոնկրետ հոդվածներով նախատեսված պատժաչափի նվազեցումը նույն հոդվածով դատապարտված անձին հնարավորություն կտա դիմել` իր պատժաչափը վերանայելու խնդրանքով:
Հիշեցնենք, որ ԱԺ պետաիրավական հարցերի հանձնաժողովի նախագահ Դավիթ Հարությունյանն Aysor.am-ին ասել էր, որ օրինագիծն իր կողմից հավանության է արժանացել ու այն «որևէ աղերս չունի ցմահ բանտարկյալների հետ»: /Aysor.am/
| 
