Նոյեմբերի 14-ից 16-ը ՀՀ ոստիկանության պետ, ոստիկանության գեներալ-լեյտենանտ Ալիկ Սարգսյանի գլխավորած պատվիրակությունը գտնվում էր Լեհաստանի Հանրապետության մայրաքաղաք Վարշավայում` Լեհաստանի Հանրապետության ներքին գործերի և վարչակազմի նախարար Եժի Միլլերի հրավերով:
Ինչպես հայտնում են ՀՀ Ոստիկանության ՀԿԼ վարչությունից, նոյեմբերի 15-ին ոստիկանության պետ, ոստիկանության գեներալ-լեյտենանտ Ալիկ Սարգսյանը հանդիպում ունեցավ Լեհաստանի Հանրապետության ոստիկանությունում: Քննարկվեցին Հայաստանի Հանրապետության ոստիկանության և Լեհաստանի Հանրապետության ոստիկանության միջև հանցավորության դեմ պայքարի տարբեր ոլորտներում միջազգային համագործակցության հետագա զարգացման հետ կապված հարցերը:
ՀՀ ոստիկանության պետի ուշադրությանը ներկայացվեցին Լեհաստանի Հանրապետության ոստիկանությունում Եվրամիության չափանիշներին համապատասխան իրականացված բարեփոխումները: Ալիկ Սարգսյանը հակիրճ ներկայացրեց ՀՀ ոստիկանության գործունեության ոլորտում 2010-2011թթ. բարեփոխումների ծրագիրը, որը բխում է Հայաստանի Հանրապետություն-Եվրոպական Միություն գործողությունների ծրագրից: Ընդգծվեց, որ անհրաժեշտ է ակտիվացնել համագործակցությունը, մասնավորապես` կազմակերպված հանցավորության, թմրամիջոցների ապօրինի շրջանառության, մարդկանց առևտրի, անօրինական միգրացիայի ոլորտներում:
Հանդիպման շրջանակներում Հայաստանի Հանրապետության ոստիկանության և Լեհաստանի Հանրապետության ոստիկանության միջև ստորագրվեց Համագործակցության մասին Հռչակագիր:
Նույն օրը ՀՀ ոստիկանության պետ, ոստիկանության գեներալ-լեյտենանտ Ալիկ Սարգսյանը հանդիպում ունեցավ Լեհաստանի Հանրապետության Ներքին գործերի և վարչակազմի նախարար Եժի Միլլերի հետ: Հանդիպման ընթացքում կարևորվեց երկու երկրների ոստիկանությունների համագործակցության զարգացման և խորացման անհրաժեշտությունը` մասնավորապես արևելյան գործընկերության ծրագրի շրջանակներում:
Հաջորդ օրը ՀՀ ոստիկանության պետ, ոստիկանության գեներալ-լեյտենանտ Ալիկ Սարգսյանն այցելեց Վարշավայի քաղաքային ոստիկանություն, որտեղ հանդիպում ունեցավ քաղաքային ոստիկանության պետ գեներալ Ադամ Մուլաժի հետ, ապա այցելեց հրամանատարական մոնիտորինգի կենտրոն:
Նույն օրը Հայաստանի Հանրապետության ոստիկանության պետ Ալիկ Սարգսյանն այցելեց Լեհաստանի Հանրապետությունում Հայաստանի Հանրապետության դեսպանություն:
ՀՀ ոստիկանության պետ, ոստիկանության գեներալ-լեյտենանտ Ալիկ Սարգսյանին այցի ընթացքում ուղեկցում էր Լեհաստանի Հանրապետությունում ՀՀ արտակարգ և լիազոր դեսպան Աշոտ Գալոյանը:
/Aysor.am/
| 
