ԵՐԵՎԱՆ, 4 նոյեմբերի. /Նովոստի-Արմենիա/. Ղարաբաղյան խնդրում Հայաստանի գլխավոր փոխզիջումը բանակցություններն ինքնուրույն անցկացնելն է՝ առանց Ղարաբաղի մասնակցության, կարծում է ՀՀ ԱԺ գիտության, կրթության, մշակույթի, երիտասարդության և սպորտի հարցերի մշտական հանձնաժողովի նախագահ Արտակ Դավթյանը:
«Մեր բոլոր նախատեսված գործողություններն ու քայլերը պետք է իրականացվեն այն բանի շուրջ, որպեսզի Լեռնային Ղարաբաղի Հանրապետությունը վերադառնա ղարաբաղյան հակամարտության կարգավորման բանակցությունների սեղանի շուրջ», - ասաց Դավթյանը:
Նրա խոսքերով՝ վաղ թե ուշ կգա ժամանակը, երբ Ղարաբաղն ինքը կվարի բանակցությունները:
«Հայաստանի երկրորդ փոխզիջումն այն է, որ մենք, հարգելով մեր գործընկերների խնդրանքներն ու չցանկանալով խախտել ղարաբաղյան հակամարտության կարգավորման շուրջ ընթացող բանակցությունների ընթացքը, մինչև հիմա չենք ճանաչել Արցախի անկախությունը», - ասաց պատգամավորը:
Նա նշեց, որ ադրբեջանական կողմը մշտապես հիշեցնում է ՄԱԿ-ի բանաձևերի մասին, սակայն այդ չորս բանաձևերից ոչ մեկը չի իրագործվել Ադրբեջանի կողմից:
Միացյալ Ազգերի Կազմակերպությունը 1993-94 թթ.-ին ղարաբաղյան հակամարտության վերաբերյալ 4 բանաձև է ընդունել:
Նրա կարծիքով՝ հենց փոխզիջումների գնալու և պարտավորությունները կատարելու Բաքվի պատրաստ չլինելն է հիմա գոյություն ունեցող կոնֆլիկտային իրավիճակի պատճառը:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչև այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան:
| 
