Այսօր «Հայաստանի եվրոպացի բարեկամներ» կազմակերպությունը հրապարակել է Հայաստանում և Լեռնային Ղարաբաղում սոցիալ-քաղաքական հարցերի և արտաքին հարաբերությունների շուրջ միջազգային մակարդակով առաջին անգամ իրականացված հանրային կարծիքի հարցման հայաստանյան արդյունքները։
Հետազոտությունը ներառում է հարցեր Հայաստանի ներքին իրավիճակի, Թուրքիայի, Լեռնային Ղարաբաղի, Եվրամիության, ԵԱՀԿ-ի և Հայաստանի հետ առնչություն ունեցող այլ միջազգային կառույցների մասին։
Ինչպես ասուլսիսի ժամանակ ասաց «Պոպուլուս» հանրային կարծիքի ուսումնասիրություններով զբաղվող ընկերության գործադիր տնօրեն Էնդյու Կուպերը, հարցում է անցկացվել, թե ինչպիսի՞ վերաբերմունք ունեն հայաստանցիները Հայաստան-Թուրքիա հարաբերությունների կարգավորման վերաբերյալ: Ըստ այդմ պարզ է դարձել, որ հայաստանցիները շատ քիչ վստահություն ունեն Թուրքիայի` որպես երկրի և թուրքերի նկատմամբ:
«Հարցվածների 75 տոկոսը հավանություն է տալիս Հայաստանի նախագահի որոշմանը` սառեցնել հայ-թուրքական արձանագրությունները, երբ Թուրքիան չվավերացրեց դրանք», - ասաց Կուպերը և հավելեց, որ հայաստանցիների մեծամասնությունը կարծում է, որ Թուրքիայի հետ գրեթե անհնար է կարգավորել հարաբերությունները:
Մինևնույն ժամանակ, հարցումները ցույց են տվել, որ որքան էլ կասկածելի է հայ-թուրքական հարաբերությունների կարգավորումը, սակայն այն շահավետ կարող է լինել: Համաձայն տվյալների` հարցվողների ճնշող մեծամասնությունը` 78 տոկոս, կարծում է, որ Հայաստանի տնտեսությունը կշահի միջազգային առևտրից, 61 տոկոսն էլ` հարաբերությունների կարգավորումը մեծ հնարավորություններ կտա Հայաստանի արտաքին քաղաքականության համար, իսկ 63 տոկոսն ասել է, որ բաց սահմանը Հայաստանին ավելի կմոտեցնի Եվրոպային:
Նշենք, որ հարցումն անցկացվել է հոկտեմբերի 15-18-ը 1208 հարցազրույցների միջոցով, Հայաստանի մարզերում և Երևանում:
/Aysor.am/
| 
