Բրիտանական «Financial Times» օրաթերթի թղթակիցը այցելել է Հայաստան, այնուհետև օտարալեզու ընթերցողին է ներկայացրել «Թուրքիայի եւ Ադրբեջանի միջեւ տեղակայված, քրիստոնեությունը որպես պետական կրոն առաջինն ընդունած այս փոքրիկ, բայց հարուստ պատմությամբ երկիրը` Հայաստանը» հոդվածը:
Ինչպես տեղեկացնում է Armenpress. am կայքը, դրանում մանրամասն ներկայացված է վերջերս Հայաստանում վերաբացված Տաթեւի համալիրը, նշվելով, որ այն «մի ժամանակ ուսուցման հռչակավոր կենտրոն է եղել հազարավոր մարդկանց համար»: «Տաթեւի վանք հասնելու համար մենք մեկժամյա շրջապտույտ կատարեցինք լեռներով` նախ անցնելով Սատանայի կամուրջը եւ ապա նորից բարձրանալով դեպի Տաթեւ», -գրել է հեղինակը:
Հիշեցնենք, որ ամսվա սկզբին աշխարհի ամենաերկար ճոպանուղին բացվեց` կապելով Տաթեւը ներքեւում գտնվող Հալիձոր գյուղի հետ: Միաժամանակ 25 ուղեւորներ տեղափոխելու հնարավորությամբ ճոպանուղին 5.7կմ ճանապարհն անցնում է 23 մղոն արագությամբ: Ակնկալվում է, որ Տաթեւի բարձունքներ տարեկան կտեղափոխվի 20հազ. այցելու, իսկ ճանապարհի տեւողությունը կհասցվի 11 րոպեի:
Նշվել է, որ մոտ 13 մլն եվրո արժողությամբ նախագիծն իրականացրել է ավստրո-շվեցարական ընկերությունը, ինչը միայն առաջին փուլն է 36մլն եվրո ընդհանուր արժեքով ծրագրի, որի նպատակն է տուրիստական հարմարություններ ապահովել վանքի եւ շրջակա կիրճի շրջանում: «Սա խորհրդանշանական մի գործընթաց է ամբողջ Հայաստանով մեկ` բարելավվում են ավտոճանապարհները, հյուրանոցները եւ տուրիստական այլ հարմարություններ` օգնելով բացել երկիրը այցելուների համար»,-նկատել է հոդվածագիրը` համեմատելով իր առաջին այցելության հետ Հայաստան 1990-ականներին: «Դա երկրաշարժից եւ երկրի անկախացումից հետո առաջին տարիներն էին, Ադրբեջանի հետ պատերազմը քայքայել էր երկրի տնտեսական վիճակը: Մայրաքաղաքի եւ Հայաստանի ծայրամասերի միջեւ կապը գրեթե չէր գործում: Այնուամենայնիվ, այսօր, Հայաստանում տնտեսության զարթոնքն ու ակտիվ ճանապարհաշինությունը խթանում է այս երկրում զբոսաշրջության զարգացումը: Բազմաթիվ օտար ընկերություններ ներդրումներ են անում Հայաստանի բուժիչ բնությամբ հարուստ տեղանքներում առողջարաններ ու հյուրանոցներ կառուցելու համար»,-նշել է հոդվածագիրը: Թղթակիցը Հայաստանի բնության տեսարժան վայրերից մասնավորապես առանձնացրել է Ջերմուկը, Դիլիջանը, Սեւանա լճի մերձակայքը եւ Լոռին:
Մանրամասն ներկայացնելով Հայաստանի պատմությունն ու մշակույթը` սկսած 301թ. քրիստոնեության ընդունումից եւ «36 ռազմիկ տառերի» գյուտից մինչեւ պարսկական, արաբական, թուրքական ասպատակությունները, 1915թ-ին Օսմանյան Թուրքիայում իրականացված Հայոց ցեղասպանությունը` «Financial Times»-ի թղթակիցը եզրափակել է. «Հայերի ազգային ինքնության պաշտպանության հիմնասյուները կրոնն ու լեզուն են»:
/Times.am/
|
