«Բոլորովին զարմանալի չէ, որ ժամանակին ազգային գաղափարախոսությունը կեղծ կատեգորիա հռչակած անձնավորությունն այսօր էլ հայկականության գաղափարախոսությունը, այն է՝ ցեղակրոնությունը համեմատում է ռասիզմի հետ»,- անդրադառնալով նախօրեին կայացած հանրահավաքում ՀՀ առաջին նախագահի հնչեցրած այն հայտարարությանը, թե ցեղակրոնությունը ոչ այլ ինչ է, եթե ոչ «ռասիզմ» բառի հայերեն թարգմանությունը՝ Aysor.am-ին փոխանցեց ԱԺ պատգամավոր, ՀՀԿ մամուլի խոսնակ Էդուարդ Շարմազանովը:
Նրա խոսքերով՝ ցեղակրոնությունը ռասիզմի հետ համեմատողները կամ գիտությունից «կիլոմետրերով հեռու են կամ միտումնավոր կերպով ցեխ են շպրտում ազգային արժեքային համակարգի վրա»:
«Ցեղակրոնությունն առողջ ազգային ուսմունք է և պատահական չէ, որ նրա «հայրը»` Գարեգին Նժդեհը հստակ ասել է, որ «միայն մարդ կոչվողը կարող է կոչվել հայ», և «Ազգերն ապրում են իրենց՝ ստեղծագործում մարդկության համար», այսինքն՝ ցեղակրոնությունն իր մեջ հումանիստական արժեքային համակարգ է ներառում, այն առողջ ու հանդուրժողական ուսմունք է»,- ընդգծեց ՀՀԿ մամուլի խոսնակը:
Է. Շարմազանովը նշեց, որ այստեղ «վտանգավոր խա» է տեսնում արդեն ազգային արժեքների դեմ:
«Այսինքն՝ այստեղ խնդիրը ոչ թե կուսակցական պատկանելությունն է, այլ ազգային արժեքային համակարգը, ինչը պարբերաբար կատարվում է նաև ադրբեջանական և թուրքական լրատվամիջոցների կողմից», - ասաց Է.Շարմազանովը:
/Aysor.am/
| 
