Այսօր պաշտոնական այցով Հայաստան է ժամանել Վրաստանի պաշտպանության նախարար Բաչո Ախալայան: ՀՀ պաշտպանության նախարարությունում Հայաստանի և Վրաստանի պաշտպանության նախարարների հանդիպումից հետո լրագրողների հետ հանդիպման ժամանակ նախարարներն ամփոփեցին քննարկումների արդյունքները և պատասխանեցին լրագրողների հարցերին:
ՀՀ պաշտպանության նախարար Սեյրան Օհանյանի փոխանցմամբ, սա վրաց նախարարի առաջին պաշտոնական այցն է մեր երկիր։ «Պաշտոնական հանդիպման շրջանակներում մենք քննարկել ենք երկկողմ համագործակցության շրջանակները, որոնք ունեն մի քանի ուղղություն։ Դա վերաբերում է խաղաղապահական խնդիրներին, ռազմական կրթությանը և վարժանքներին, պաշտոնական այլ այցերին։ Անդրադարձել ենք նաև տարածաշրջանային անվտանգության և կայունության խնդրին»,-նշեց Սեյրան Օհանյանը։
Վրաստանի պաշտպանության նախարար Բաչո Ախալայան շնորհակալություն հայտնեց ջերմ ընդունելության համար և նշեց, որ այսօրվա իր այցը երկկողմանի սերտ համագործակցության արդյունք է։ Վրաց նախարարն անդրադարձավ նաև ԼՂՀ հիմնախնդրին և Ադրբեջանի դիրքորոշմանը։ «Մեր նպատակն է տարածաշրջանային անվտանգությունը և կայունությունը։ Մենք ուզում ենք, որ տարածաշրջանի կոնֆլիկտները լուծում ստանան միայն խաղաղ ճանապարհով»,- նշեց Վրաստանի պաշտպանության նախարար Բաչո Ախալայան։
/Panorama.am/
| 
