Շվեդիայի Ռիկսդագի կողմից Հայոց ցեղասպանության ճանաչման, ինչպես նաև Հայաստան-Շվեդիա միջխորհրդարանական կապերի ամրապնդման և զարգացման գործում նշանակալի ավանդի համար Շվեդիայի Թագավորության Ռիկսդագի պատգամավորներ Անելի Էնոքսոնըն ու Ֆրեդրիկ Մալմը պարգևատրել են ՀՀ Ազգային ժողովի Պատվո մեդալով: Իսկ պարգևները, ինչպես տեղեկացնում են ԱԺ հասարակայնության հետ կապերի վարչությունից, հանդիսավոր պայմաններում նրանց հանձնեց ԱԺ նախագահ Հովիկ Աբրահամյանը.
«Դուք այն քաղաքական գործիչներն եք, ովքեր խիզախություն ունեցան ուղիղ նայելու ճշմարտության աչքերին և նշանակալի ավանդ ունենալ Շվեդիայի խորհրդարանի կողմից Հայոց Ցեղասպանության ճանաչման գործում»,- իր ելույթում ասել է ԱԺ նախագահը:
Հիշեցնենք, որ 2010թ-ի մարտի 11-ին Շվեդիայի խորհրդարանը հիշյալ անձանց մասնակցությամբ ու ջանքերով, ինչի մասին շեշտել է նաև Հ.Աբրահամյանը, ընդունել է որոշում, որով 1915 թ-ն Օսմանյան կայսրությունում տեղի ունեցած իրադարձությունները ճանաչվեցին որպես ցեղասպանություն:
«Տեղյակ եմ, թե ինչ լարվածության ու դիմակայության պայմաններում է ընդունվել այդ որոշումը և այս պարագայում առավել ծանրակշիռ է դառնում անձամբ ձեր և որոշումն ընդունելուն նպաստած ձեր գործընկերների ներդրումը ոչ միայն Հայոց Ցեղասպանության ճանաչման, այլև ընդհանրապես ցեղասպանություն երևույթը որպես հրեշավոր հանցագործություն կանխելու մեջ»,- ասել է Հ.Աբրահամյանը:
1915 թ-ն Օսմանյան Թուրքիայում իրականացված Հայոց Ցեղասպանությունը դեռևս ամբողջական արդարացի դատապարտման չի արժանացել միջազգային հանրության կողմից, թեև աշխարհի շատ պետությունների խորհրդարաններ ու կառավարություններ, միջազգային կառույցներ ճանաչել են այն: Չափազանց կարևոր է, որ հանցագործություն կատարածն ինքը կարողանա հրապարակայնորեն գիտակցել և ընդունել մեղքը, ավելացրել է ԱԺ նախագահը, իրերը կոչել իրենց անուններով և փորձել ապաշխարած անդամագրվել քաղաքակիրթ Եվրոպայի ընտանիքին.
«Շվեդիայի խորհրդարանի ընդունած որոշման մեջ նշված հետևյալ արտահայտությունը ճշգրիտ բնութագրում է իրավիճակը. Թուրքիան չի կարող ժողովրդավարական պետություն համարվել, քանի դեռ այնտեղ ժխտվում է անցյալի իրական պատկերը»:
Ավարտելով խոսքը` ՀՀ ԱԺ նախագահը խորհրդարանի , իր գործընկերների, ՀՀ ժողովրդի անունից շնորհակալություն է հայտնել Անելի Էնոքսոնին ու Ֆրեդրիկ Մալմին 2010 թ. մարտի 11-ին Շվեդիայի խորհրդարանի կողմից 1915 թ. Օսմանյան կայսրությունում տեղի ունեցած իրադարձությունները որպես ցեղասպանություն ճանաչելու մասին որոշման ընդունման հարցում ունեցած ներդրման և մասնակցության համար.
«Դուք հայ ժողովրդի իրական բարեկամներն եք»- նշել է նա:
Իր հերթին Շվեդիայի Ռիկսդագի պատգամավոր Ա.Էնոքսոնը, շնորհակալություն հայտնելով բարձր պարգևի համար, ասել է, որ 2011 թ. մարտի 11-ին Շվեդիայի խորհրդարանում Ցեղասպանությունը ճանաչելու օգտին քվեարկել են, քանի մենք դա բխում էր իրենց հոգու խորքից.
«Որևէ ազգ, որևէ պետություն չի կարող հանգիստ մնալ, որ անցյալում տեղի ունեցածը մոռացության մատնվի: Թուրքիան պետք է ներողություն խնդրի ձեր ժողովրդի նկատմամբ կատարված ցեղասպանության համար»,- հայտարարել է Անելի Էնոքսոնը` հայ ժողովրդին մաղթելով ամենայն բարիք.«Աստված թող օրհնի ձեզ»:
/Panorama.am/
|
