«Յուրաքանչյուր ժողովուրդ հպարտանում է նրանով, ինչ ունի: Մեր նախագահը Աստրախանում պսակ դրեց Աստրախանի հայկական համայնքի գործունեությունը խորհրդանշող հայկական խաչքարին: Քանի որ ադրբեջանցիների պետությունն ունի ընդամենը 90 տարվա պատմություն, իսկ ազգն էլ 36 թվականից հետո է դարձել ադրբեջանցի (մինչ այդ գործածվում էր կամ բացառապես մահմեդական, կամ կովկասյան թուրք, կամ կովկասյան թաթարներ), դրա համար էլ մշակութային ժառանգություն չունենալով` ադրբեջանցիները պետք է այդպիսի քայլ կատարեին և բացեցին Հեյդար Ալիևի արձանը»,- լրագրողներին այսօր ասաց Հանրապետական կուսակցության մամուլի խոսնակ Էդուարդ Շարմազանովը` անդրադառնալով Աստրախանում բացված և ադրբեջանցիների ցնծության առարկա դարձած Հեյդար Ալիևի հուշարձանին:
Ադրբեջանը, ըստ Շարմազանովի, հաղթահարելով հայկական բարդույթները, կուռքեր, արձաններ է սարքում, խոնարհվում դրանց առաջ:
«Նրանք մեծ-մեծ դրոշներ են պատվիրում, որոնք պատռվում են, իհարկե, իրենց համար անհասկանալի պատճառներով…»,- ասաց ԱԺ պատգամավորը և ընդգծեց, որ այդկերպ ադրբեջանցիներն ինքնահաստատման փորձեր են կատարում:
Է. Շարմազանովը չբացառեց նաև, որ հայր Ալիևի ուրվականն ամեն օր հետապնդում է որդի Ալիևին ու վերջինս դարձել է «մերօրյա Համլետ»: /Aysor.am/
|
