Վարչապետ Տիգրան Սարգսյանն այսօր մասնակցել է ԱՊՀ անդամ-պետությունների մաքսային ծառայությունների ղեկավարների խորհրդի 52-րդ նիստին։ Հոկտեմբերի 25-27-ը Երևանում արդեն երրորդ անգամ անցկացվող նիստին մասնակցում են ԱՊՀ մաքսային ծառայությունների ղեկավարներն ու փորձագետները։ 1993թ. դեկտեմբերի 23-ին ստեղծված այս խորհրդի գործունեությունը նպատակաուղղված է տնտեսական ինտեգրման խորացմանը, ԱՊՀ մաքսային ծառայությունների գործողությունների համակարգմանը, մաքսային օրենսդրությունների ներդաշնակեցմանը և մաքսային ընթացակարգերի միասնականացմանը։
Նիստի սկզբում վարչապետը հանդես է եկել ելույթով, որում, մասնավորապես, նշել է. «Արդեն երրորդ անգամ Երևանում նիստի կազմակերպման փաստն ընդգծում է ԱՊՀ շրջանակում տարածաշրջանային համագործակցության ակտիվացման մեջ Հայաստանի Հանրապետության շահագրգռվածությունը։ ԱՊՀ մաքսային ծառայությունների ղեկավարների խորհրդի գործունեությունն ուղղված է այնպիսի փաստաթղթերի մշակմանը և ընդունմանը, որոնք նպաստելու են մեր երկրների առևտրատնտեսական ներուժի առավելագույնս լիարժեք օգտագործմանը, մաքսային օրենսդրությունների ներդաշնակեցմանը, մաքսային ընթացակարգերի դյուրացմանը, մաքսանենգության դեմ համաձայնեցված պայքարի միջոցների մշակմանը և ստվերային ու կեղծված արտադրանքից ներքին շուկաների պաշտպանությանը։ Ձևավորվում է մաքսային իրավախախտումների կանխման ուղղությամբ համաձայնեցված օպերատիվ միջոցառումների ու միասնականացված գործողությունների անցկացման ընթացակարգ։
Թույլ տվեք համոզմունք հայտնել, որ հանցավոր խմբավորումները հիմնականում ձևավորում են ստվերային տնտեսություն։ Հաշվի առնելով այդ հանգամանքը` մաքսային հանցագործությունների և կոռուպցիայի դեմ պայքարը, կեղծված արտադրանքից ներքին շուկաների պաշտպանությունը և մաքսային արժեքի սահմանմանը, ռիսկերի կառավարմանը, էլեկտրոնային հայտարարագրմանն ու էլեկտրոնային տեսքով տեղեկատվության փոխանակմանն առնչվող հարցերը պետք է առաջնահերթ լինեն ԱՊՀ մաքսային ծառայությունների գործունեության մեջ։
Եվս մեկ անգամ ողջունում եմ բոլոր ներկաներին և մաղթում ձեզ բեղմնավոր ու արդյունավետ աշխատանք»։
/Times.am/
| 
