Երեկ ադրբեջանցի դիպուկահարի արձակած փամփուշտի զոհ դարձավ քսանամյա հայ զինվոր Հարութ Գրիգորյանը: Հատկանշական է, որ դեպքը տեղի ունեցել Հայաստանի, Ադրբեջանի և Ռուսաստանի նախագահների հերթական հանդիպման նախօրեին: Թե ինչ նպատակներ է հետապնդում ադրբեջանական կողմը նման սադրանքների միջոցով Times.am-ի թղթակիցը փորձել է պարզել ռազմական հոգեբան Դավիթ Ջամալյանից:
«Նման ճանապարհով Ադրբեջանը որևէ ռազմական խնդիր չի լուծում: Երեք նախագահների հանդիպումից առաջ սա ավելի շատ քարոզչական քայլ էր», – վստահություն հայտնեց Ջամալյանը: «Մենք հաճախ ենք ականատես լինում, որ նման հանդիպումներից առաջ ադրբեջանցիներն ապակայունացնող գործողություններ են իրականացնում: Քանի որ հիմա բանակցային գործընթացն ընթանում է ավելի շատ մեր օգտին, Ադրբեջանն այսպիսով խնդիր ունի ապակայունացնել իրավիճակը, ճնշում գործադրել, իբր թե ցույց տալ, թե իրենք համաձայն չենք այս իրավիճակի հետ, բողոք արտահայտել»:
Ըստ փորձագետի, նամն ճանապարհով ադրբեջանցիները փորձում են ճնշում գործադրել նաև ԵԱՀԿ Մինսկի խմբի վրա: «Բոլորին էլ ձեռնտու է կայուն իրավիճակը տարածաշրջանում, իսկ Ադրբեջանը միտումնավոր ապակայունացնում է այն` փորձելով պայմաններ թելադրել: Այս գործողություններն, իհարկե, ուղղված են ոչ միայն հայ հասարակությանը, այլև` միջազգային հանրությանն ու հենց իրենց` ադրբեջանցիներին: Սրանք կարծես թե Ալիևի ռազմական հոխորտանքի իրականացումն են, խոսքից գործի անցնելու քայլերը: Ալիևն անընդհատ ասում է, թե պատերազմ է լինելու, սակայն ոչինչ չի լինում, և սպանությունները սահմանի վրա նպատակ ունեն համոզելու ադրբեջանցիներին, թե իրենց ղեկավարությունը ոչ միայն խոսում, այլև գործում է: Իսկ մեզ նրանք ցանկանում են ցույց տալ, թե հզոր են: Սա առավելապես քարոզչական քայլ է», – ասել է ռազմական հոգեբանը:
Ի պատասխան այն հարցին, թե ինչ պետք է անի հայկական կողմն Ադրբեջանի ոճրագործություններին հակազդելու համար, Ջամալյանն նշեց, որ ԼՂՀ ՊՆ վերջերս շատ հստակ հայտարարություն արեց, ասելով, որ նման գործողությւոններն անպատիժ չեն մնալու: «Կտրուկ գործողությւոններ պետք է արվեն` Ադրբեջանի այսօրինակ հանցագործությունները չեզոքացնելու համար: Տարիների փորձը ցույց է տալիս, որ Արցախում թշնամին անպատիժ չի մնում: Սա շատ կարևոր է: Նրանք փակագծերը չբացեցին, սակայն պատասխան հաստատ կլինի», – համոզմունք հայտնեց Դավիթ Ջամալյանը, որն իր ցավակցանքի խոսքերն հայտնեց Հարութ Գրիգորյանի հարազատներին: «Չնայած հիմա որևէ սփոփանքի խոսք անզոր է, սակայն նրանք պետք է իմանան, որ իրենց որդին զոհվել է հերոսի մահով», – ասել է Ջամալյանը:
/Times.am/
|
