Այսօր ՀՀ գրողների միության մեծ դահլիճում տեղի է ունենալու արցախյան օրակարգով քաղաքացիական ժողով: Նախաձեռնող խմբի անդամները նշում են, որ ԼՂՀ-ն իր անկախության հռչակման 20-ամյակի նախաշեմին տակավին մնում է պաշտոնապես չճանաչված թե՛ միջազգային հանրության և թե էլ ՀՀ-ի կողմից:
«Երբ գնալով ահագնանում են հայկական երկու պետությունների հանդեպ արտաքին մարտահրավերները, հատկապես իրական է դարձել Մադրիդյան սկզբունքների իրագործման և Հայաստանի, այդ թվում Արցախի անվտանգության խաթարման վտանգը, մենք՝ Հայաստանի և Լեռնային Ղարաբաղի հանրապետությունների քաղաքացիական հասարակությունների ներկայացուցիչներս, չենք կարող անտարբեր մնալ Արցախին վերաբերող խնդիրների հանդեպ և դրանք լայն շրջանակով քննարկելու նպատակով հրավիրում ենք Քաղաքացիական ժողով՝ «Արցախ» օրակարգով»:
«Այդ խնդիրները լայն շրջանակով քննարկելու նպատակով կոչ ենք անում Հայաստանի եւ Արցախի բոլոր հասարակական կազմակերպությունների, կուսակցությունների, ԶԼՄ-ների ներկայացուցիչներին, մտավորականներին, խնդրո առնչությամբ մտահոգ բոլոր քաղաքացիներին մասնակցել Քաղաքացիական ժողովին, որի օրակարգում են ԼՂՀ անկախության պաշտոնական ճանաչումը, Փախստականների եւ Արցախի բնակեցումը, Արցախի ամբողջականությունը եւ Մադրիդյան սկզբունքները: Քաղաքացիական ժողովը տղի կունենա սույն թվականի հոկտեմբերի 21-ին, ժ. 14.00-ին ՀՀ գրողների միության մեծ դահլիճում, Բաղրամյան 3 հասցով»,-ասված է նախաձեռնող խմբի տարածած հաղորդագրությունում:
/Times.am/
|
