«Թուրքիան պետք է հասկանա, որ հայ ժողովրդի դեմը խաղ չկա, որ ոչ մի բան անպատիժ չի մնում»: Այսօր այս մասին լրագրողների հետ հանդիպման ժամանակ ասաց Արցախյան հերոսամարտի «Խաչակիրների ջոկատի» զինվոր Շահե Աճեմյանը:
Հիշեցնենք, որ այսօր լրանում է 90 տարին այն օրվանից, երբ հայ վրիժառու Սողոմոն Թեհլերյանը սպանեց թուրք ցեղասպան Թալեաթ Փաշային:
Խոսելով այդ թեմայով, բանախոսն ասաց, որ վստահ է` Ցեղասպանության կազմակերպիչների սպանությունները «օդ ու ջրի» պես հարկավոր են եղել հայ ժողովրդին: Հենց այդ քայլից հետո, ըստ Շ. Աճեմյանի, Թուրիքան հասկացավ, որ ոչինչ անպատիժ չի մնում:
«1921թ-ի մարտի 15-ն էր, երբ հայ վրիժառու Սողոմոն Թեհլերյանը Բեռլինում սպանեց Հայոց Ցեղասպանության կազմակերպիչներից Թալեաթ Փաշային: Այնուհետև, տարիներ անց, հայկական կողմը կարողացավ այնպիսի պահանջներ ներկյացնել, որ աշխարհը հիշի ցեղասպանությունը: Հաճախ, փոշիացած դարակներից հանվեցին արխիվներն ու խոսեցին թուրքերի կատարած ոճրագործության մասին»,-ասաց Շ. Աճեմյանը:
Ըստ նրա, հենց այդ տղաների արարքների շնորհիվ էլ, մի շարք պետություններ ընդունեցին Հայոց Ցեղասպանության փաստը: Բանախոսը համոզմունք հայտնեց, որ դեռ այսօր էլ հայ ժողովրդի մեջ կա այդ ոգին, ազգի պատվի համար պայքարող ոգին, իսկ անհրաժեշտության դեօքում, ինչպես նա նշեց, «տարիներ առաջ կատարվածը կարող է կրկնվել»:
Բանախոսը վերջում առաջարկեց Սփյուռքից բերել Նեմեսիս գործողությունների իրականացնողներին: Նա հատկանշեց. արդեն 20 տարի է անցել, սակայն Սումգայիթի գործողություններ իրականացնողները դարձյալ անպատիժ են:
/Panorama.am/
|
