PanARMENIAN.Net - Ամերիկյան իշխանությունները սկսել են հետաքննել WikiLeaks կայքի հիմնադիր Ջուլիան Ասանժի գործողությունները, որը հրապարակել էր ԱՄՆ Պետդեպարտամենտի գաղտնի փաստաթղթերը: Որոշվում է, կարելի է արդյոք Ասանժի գործողությունները որակավորել որպես լրտեսություն, հաղորդում է Lenta.ru-ն` մեջբերելով The Washington Post-ին:
ԱՄՆ գլխավոր դատախազ Էրիկ Հոլդերի խոսքերով, հետաքննությանը մասնակցում են Պենտագոնը և Արդարադատության նախարարությունը: Ենթադրվում է, որ նրանք ուսումնասիրելու են Ասանժին մեղադրանքներ ներկայացնելու հնարավորությունը` լրտեսության մասին ակտին համապատասխան մեղադրանքներ ներկայացնելու համար, որն արգելում է միջամտել զինվորականների գործողություններին և բացահայտել նրանց տեղաբաշխման մասին տեղեկատվությունը զինված հակամարտությունների ժամանակ:
Առանձին հետաքննություն է անցկացնում նաև Հետաքննությունների դաշնային բյուրոն (ՀԴԲ), որը պետք է բացահայտի նրանց, ովքեր գաղտնի տեղեկությունները փոխանցել են WikiLeaks-ի հիմնադրին:
Մեկնաբանելով Պենտագոնի և Արդարադատության նախարարության հետաքննությունների հեռանկաները` փորձագետները կասկած են հայտնել, որ Ասանժին մեղադրանքներ են ներկայացվելու լրտեսության մեղադրանքով: Իրենց խոսքերը նրանք հիմնավորել են նրանով, որ WikiLeaks-ի հիմնադիրը կարող է օգտվել ԱՄՆ Սահմանադրության առաջին շտկումից, որը երաշխավորում է խոսքի ազատություն:
Այն դեպքում, եթե Ասանժին մեղադրանքներ ներկայացվեն, ԱՄՆ իշխանությունները պահանջելու են նրան արտաքսել այն երկրից, որում նա գտնվում է: Միաժամանակ, փորձագետների կարծիքով, Ասանժին հանձնելը հեշտ չի լինի, քանի որ ամերիկյան ղեկավարությանը կարող են մերժել նույն առաջին շտկման հիման վրա:
/Panarmenian.net/
|