ՎիվաՍել-ՄՏՍ ընկերության գլխավոր տնօրեն Ռալֆ Յիրիկյանն ու Հայաստանի պետական ֆիլհարմոնիկ նվագախմբի գեղարվեստական ղեկավար /ՀՊՖՆ/, գլխավոր դիրիժոր Էդուարդ Թոփչյանն այսօր լրագրողների հետ հանդիպման ժամանակ ներկայացրեցին 2010-2011 թվականների ընթացքում համատեղ իրականացրած և առաջիկայում իրականացվելիք ծրագրերը:
Հայաստանի պետական ֆիլհարմոնիկ նվագախմբի գեղարվեստական ղեկավար /ՀՊՖՆ/ և գլխավոր դիրիժոր Էդուարդ Թոփչյանը հայտնեց, որ մարտի 25-ին նվագախումբը կներկայացնի Չայկովսկու ստեղծագործությունը`«Շչելկունչիկ» գրական-երաժշտական կոմպոզիցիան` բալետի երաժշտության ամբողջական կատարմամբ: Նրա խոսքով, գարնանը նաև հայ հանդիսատեսի կներկայացվի «Սևիլյան սափրիչ» օպերան:
ՎիվաՍել-ՄՏՍ ընկերության գլխավոր տնօրեն Ռալֆ Յիրիկյանը նշեց, որ արդեն երկրորդ տարին է, որ ՎիվաՍել-ՄՏՍ ընկերությունն օժանդակում է նվագախմբին մի շարք ծրագրեր իրականացնելու համար: «Մենք շատ լավ գիտակցում ենք, որ մեր նախնիների ստեղծած մշակութային արժեքները պետք է փոխանցենք վաղվա սերնդին, իսկ այս նվագախումբն այդ ուղղությամբ մեծ ծրագրեր է իրականացնում: Երաժշտությունն և արվեստն ազգի դիմագիծն է, և մեր նպատակն է օգնել և օժանդակել հայ մշակույթի զարգացմանը»,- հավելեց նա:
Էդուարդ Թոփչյանի խոսքով, ամբողջ աշխարհում մեծ ֆիլհարմոնիկ նվագախմբերը միշտ ֆինանսական օժանդակության կարիք ունեն: «Մեր նվագախումբը հովանավորների շնորհիվ է, որ կարողանում է իր գոյությունը պահպանել, սակայն պետք է նշեմ, որ երկրի նախագահը նույնպես մեծ օժանդակություն է ցուցաբերում մեր ծրագրերին»,- ասաց նա և հավելեց, որ շատ ողջունելի է, որ ՎիվաՍել-ՄՏՍ ընկերության արդեն երկրորդ տարին է նվագախմբի գլխավոր հովանավորն է: Նրա խոսքով, ընկերության ֆինանսական աջակցության շնորհիվ է, որ նվագախմբի անդամները չեն լքել երկիրը:
Ասուլիսին ներկա ՀՊՖՆ-ի տնօրեն Ռուզաննա Սիրունյանն էլ նշեց, որ ՎիվաՍել-ՄՏՍ ընկերության ֆինանսական օժանդակության շնորհիվ բարձրացել է նվագախմբի անդամների աշխատավարձը:
Է. Թոփչյանը նշեց, որ ընկերության աջակցությամբ այս տարի սեպտեմբերին կմեկնարկի ՀՊՖՆ-ի նոր համերգաշրջանը ` երևանյան 5-րդ միջազգային փառատոնով, որին իրենց մասնակցությունը կբերեն համաշխարհային ճանաչում ունեցող այնպիսի մենակատարներ, ինչպիսիք են Ջուլիա Ֆիլերը, Կոնստանտին Լիֆշիցը, Պոլ Մայերը, Ժիլբեր Օդին և այլք: Նա նաև նշեց, որ այս տարի մեկնարկել է նոր համերգաշար բուհերի ուսանողների և դպրոցականների համար:
Նա նշեց, որ այս տարի լրանալու է նվագախմբի 85-ամյակն և ՀՀ անկախության 20-ամյակը: Է. Թոփչյանխ խոսքով, այս երկու մեծ տոների առթիվ կազմակերպվելու է մեծ համերգ, որին հրավիրվելու են աշխարհահռչակ օպերային երգիչ Պլասիդո Դոմինգոն և աշխարհահռչակ ալտահար Յուրի Բաշմետը: Է. Թոփչյանի խոսքով, այս տարի նաև նոյեմբերին նվագախումբը համերգային ծրագրով պետք է մեկնի Ճապոնիա, իսկ 2012 թվականին համերգային ծրագրով հանդես է գալու Իտալիայում և Ավստիրայում:
Տարբեր նախագծերի կյանքի կոչելու հարցում ՎիվաՍել-ՄՏՍ ընկերության պատրաստակամ աջակցության շնորհիվ, 2010-2011 թթ համերգաշրջանում ՀՊՖՆ-ն կազմակերպել է շուրջ 35 համերգ Երևանում, երկուսը` Ֆրանկֆուրտում, ևս մեկը` Բրատիսլավայում: Այս տարի նախատեսված է ևս 20 համերգ:
/Panorama.am/
| 
