Այսօր www.armhotels.am առաջին ազգային առցանց ամրագրման համակարգի շնորհանդեսի ժամանակ ՀՀ վարչապետ Տիգրան Սարգսյանը փորձարկեց կայքը. նա «այցելեց» Ծաղկաձոր, հետո փորձեց «ամրագրում կատարել» Արզնի առողջարանում, սակայն քարտում գումարը չբավականացրեց: Միաժամանակ վարչապետը նկատեց` «ուրիշ գլոբուս չկա՞»:
Տ. Սարգսյանը շնորհավորեց նախագծի հեղինակ «ՌՈՒՄԷԱ» Գայթակղիչ Ճամփորդությունների Ակումբ ընկերությանը հաջող ձեռնարկի կապակցությամբ: Ըստ նրա, գերնպատակը մեկն է` խթանել տուրիզմի զարգացումը ՀՀ-ում. «Դա կառավարության գերակայություններից մեկն է և դասվում է այն ոլորտին, որը համահունչ է արտահանման հետ»:
Տ. Սարգսյանի խոսքով, կառավարության ջանքերը տուրիզմի զարգացման գործում տալիս են իրենց դրական արդյունքները, ինչի ապացույցն է ճգնաժամային 2009 թ-ին զբոսաշրջության ոլորտում գրանցվել է 4 % աճ, երբ աշխարհում այս ոլորտում անկում էր արձանագրվել, իսկ 2010 թ-ին աճը կազմել է 17 %: Տ. Սարգսյանի համաձայն, զբոսաշրջությունը պետք է դառնա բազմաբովանդակ` սպորտային, հոգևոր, առողջարանային և այլն:
«Եթե որպես թերություն նշում էինք, որ զբոսաշրջիկների մեջ մեծ տեսակարար կշիռ են զբաղոցնում է մեր հայրենակիցները, ապա տարիների ընթացքում օտարերկրացիների թիվն աճում է»,- ասաց Տ. Սարգսյանը, հավելելով, որ արտասահմանում բնակվող մեր հայրենակիցների 95 %-ը երբեք Հայաստանում չի եղել: Նա շեշտեց, որ զբոսաշրջիկների թիվը 3 մլն-ի հասցնելու թիրախը կրկին արդիական է և կարճ ժամանակահատվածում պետք է հասնենք դրան: Այդ առումով, ըստ վարչապետի, այս համակարգը լավագույն ներդրումներից մեկն է զբոսաշրջության զարգացման բնագավառում, որը բացում է բազմթիվ պատուհաններ աշխարհում Հայաստանը ներկայացնելու համար:
/Aysor.am/
|
