Ճապոնիայում տեղի ունեցած 9.0 մագնիտուդով երկրաշարժից և դրան հաջորդած ավերիչ ցունամիից անմիջապես հետո, Հայաստանի նախագահի հանձնարարությամբ, լրիվ պատրաստականության է բերված Հայաստանի արտակարգ իրավիճակների նախարարության 25 հոգանոց փրկարար ջոկատը` մեկնելու Ճապոնիա ու մասնակցելու փրկարարական գործողություններին:
Ինչպես Panorama.am-ին տեղեկացնում են ԱԻՆ լրատվական ծառայությունից, փրկարարներից 22-ը միջազգային չափանիշներին համապատասխան հանդերձավորմամբ, Ճապոնիայի կողմից հաստատման դեպքում, կմեկնեն աղետի գոտի: Աղետից հետո ՄԱԿ-ը հայտարարել էր «Աղետների գնահատման և հակազդման (UNDAC) թիմի» հավաք:
Մեր տարածաշրջանում UNDAC-ի անդամ են հանդիսանում ՀՀ ԱԻՆ երկու բարձրաստիճան սպաներ: ԱԻ նախարարի հանձնարարականով UNDAC անդամ հայ սպաները հայտնել են աղետյալ երկիր մեկնելու իրենց պատրաստակամությունը:
Նշենք, որ ՄԱԿ-ի «Աղետների գնահատման և հակազդման թիմը» (UNDAC) բաղկացած է աղետների կառավարման մասնագետներից: Աղետյալ երկրի խնդրանքով, UNDAC թիմը ժամանում է երկիր, առաջնահերթ կարիքների արագ գնահատում իրականացնում և աջակցում տեղի իշխանություններին ու ՄԱԿ-ի մշտական ներկայացուցչին` համակարգելու միջազգային օգնությունը: Այս օրերին Ճապոնիայում անընդմեջ տեղի են ունենում երկրաշարժեր. 6,2 մագնիտուդով երկրաշարժ է գրանցվել նաև այսօր, որը ցնցել է Տոկիոն ու հարակից շրջանները: Այս անգամ երկրաշարժի հետևանքով առաջացած ցնցումներից, ինչպես տեղեկացնում է «ԻՏԱՌ-ՏԱՍՍ»-ը, շենք ու շինություններ են շարժվել, սակայն ավերածություններ չեն եղել:
/Panorama.am/
|