Ինչպես արդեն նշել էինք, Լեռնային Ղարաբաղ կատարած այցից հետո Ազգային Ժողովում է գտնվում Եվրոպական խորհրդարանի պատգամավոր, եվրոպական պահպանողականների ու ռեֆորմիստների խմբի ներկայացուցիչ, Հայաստանի հարցերով հիմնական զեկուցող Տոմաշ Պորեբան: Panorama.am-ին հաջողվեց պատգամավորից ճշտել տպավորությունները, որ վերջինս ստացել է ԼՂՀ այցելությունից ու հատկապես հանրապետության ղեկավարության հետ հանդիպումներից:
«Ես ուղղակի պարտավոր էի այցելել նաև Լեռնային Ղարաբաղ, դա ուղղակի անհրաժեշտ է օբյեկտվի զեկույց պատրաստելու համար»,- արձագանքեց Տ.Պորեբան:
Նշենք, որ ԵԽ պատգամավորը երկու օր է անցկացրել ԼՂ-ում, հանդիպել է նախագահ Բակո Սահակյանի, ԼՂՀ ԱԺ նախագահ Աշոտ Ղուլյանի, արտգործնախարարի և այլ պաշտոնատար անձանց ու ժողովրդի :
Ինչպես ինքն ասաց մեզ հետ զրույցում` հիմնական նպատակն էր հանդիպել ու լսել նաև ժողովրդին:
Անդրադառնալով ԼՂՀ ԱԺ նախագահի հետ հանդիպմանը, Տ.Պորեբայից հետաքրքրվեցինք` Ա.Ղուլյանը, խոսելով ԵԱՀԿ Մինսկի խմբի շրջանակում Ղարաբաղյան հակամարտության կարգավորման մասին շեշտել է այն հանգամանքը, որ Ղարաբաղը պետք է լիարժեք բանակցային կողմ լինի և այս իմաստով ի՞նչ կարծիքի է զեկուցողը:
Սակայն վերջինս տվեց խուսափոխական պատասխան. «Ես Հայաստանի հարցերով եմ զեկուցող ... Բայց համոզված եմ, որ հակամարտությունը պետք է կարգավորվի ԵԱՀԿ ՄԽ-ի շրջանակում, ինչպես նաև մադրիդյան սկզբունքների հիման վրա»:
Նա հավելեց, որ իր այցելության հիմնական նպատակն էր ծանոթանալ քաղաքական էլիտայի ու ժողովրդի հետ, քանի որ առանց դրա, նրա խեսքեվ, հնարավոր չէր լինի պատրաստել զեկույց Հայաստանի վերաբերյալ:
Արդյո՞ք համապատասխանում էր այն, ինչ նա գիտեր մինչ Արցախում լինելը նրան, ինչ պատգամավորը տեսավ այցելության ընթացքում.
«Սա իմ առաջին այցն էր ու, հետևաբար, նաև առաջին տպավորություններս են, որոնք ես կկիսեմ իմ գործընկերների հետ ԵԽ-ում: Պատրաստվում եմ դրանք ներկայացնել նաև Հայաստանի նախագահ Սերժ Սարգսյանին, ում հանդիպելու եմ այսօր»,- հավելեց Տ.Պորեբան:
Ի դեպ, Հայաստան ու Արցախ կատարած այցից հետո զեկուցողն այցելելու է նաև Վրաստան ու Ադրբեջան:
«Թեև ես Հայաստանի գծով եմ զեկուցող, բայց այս երկրները կապված են մեկը մյուսի հետ», -մանրամասնեց նա:
/Panorama.am/
| 
