Այսօր ՀՀ տրանսպորտի և կապի նախարար Մանուկ Վարդանյանը և Վրաստանի տարածաշրջանային զարգացման և ենթակառուցվածքների նախարար Ռամազ Նիկոլաիշվիլին ստորագրեցին համագործակցության վերաբերյալ հուշագիր, որին հաջորդեց նախարարների ասուլիսը։
«Արդեն երկու օր է Ռամազ Նիկոլաիշվիլու հետ քննարկում ենք երկկողմ հետաքրքրություն ներկայացնող մի շարք ճանապարհների շինարարության ծրագրեր։ Ներկայում ֆինանսական կազմակերպություններն ուսումնասիրում են նախագծային լուծումները և Հայաստանում և Վրաստանում կառուցվող ճանապարհները։ Քննարկել ենք նաև Հյուսիս-հարավ ճանապարհի շինարարության խնդիրները, Վերին Լարսի ճանապարհի վերականագնման հետ կապված հարցեր»,-տեղեկացրեց ՀՀ տրանսպորտի նախարարը։
Մանուկ Վարդանյանի փոխանցմամբ, այս տարի աշխատանքները տարվելու են 4 ուղղությամբ` Բավրայի, Հյուսիս-հարավ, Սևանի, և Ապարան-Վանձոր-Ալավերդի: Նախագծերը ֆինանասավորում են Ասիական բանկը և Համաշխարհային բանկը:
Վրաստանի տարածաշրջանային զարգացման և ենթակառուցվածքների նախարար Ռամազ Նիկոլաիշվիլին կարևորեց այն փաստը, որ մինչև Փոթի հասնող նոր ճանապարհի շնորհիվ դեպի սևծովյան հանգստավայրեր տանող ճանապարհի երկարությունը զգալիորեն կկրճատվի։
ՀՀ տրանսպորտի նախարար Մանուկ Վարդանյանը նաև հայտնեց, որ մարտի 21-22-ին հայկական պատվիրակությունը աշխատանքային այցով մեկնելու է Վրաստան:
/Panorama.am/
| 
