Սոչիում մարտի 5-ին կայացած Ռուսաստանի, Հայաստանի և Ադրբեջանի նախագահների եռակողմ հանդիպումը կարելի է համարել հանգրվանային: Այս մասին այսօր Ծաղկաձորում լրագրողների հետ ճեպազրույցում ասաց ՀՀ Նախագահ Սերժ Սարգսյանը` նշելով, որ կա բանակցային հստակ հիմք և կան կարճաժամկետ պայմանավորվածություններ:
«Երկարաժամկետ առումով, իհարկե, բանակցությունները շարունակվելու են: Կարծեմ թե Սոչիում, ի վերջո, նշմարվեց, թե ինչ ճանապարհով կարող ենք առաջ շարժվել: Իսկ կարճաժամկետ պայմանավորվածությունները շատ կարևոր են այն առումով, որ նախ դրանք ուղղված են հրադադարի ռեժիմի համակողմանի պահպանությանը, և երկրորդ, կարող են ցույց տալ, թե ինչպես են կողմերը իրենց պարտավորությունները կատարում»,- ասաց Նախագահը:
Ըստ Ս.Սարգսյանի` տևական ժամանակ խոսում էին հենց հրադադարի ռեժիմի պահպանության, վստահության միջոցառումների պահպանության մասին, քանի որ միշտ կարելի է կարճ ժամանակում լարվածություն ստեղծել, իսկ խաղաղության, լարվածությունը թուլացնելու գործընթացը շատ ավելի ծանր է:
«Եվ հիմա մենք, ըստ պայմանավորվածությունների, մտնում ենք այդպիսի մի գործընթացի մեջ, որտեղ մենք պիտի կարողանանք լարվածությունը թուլացնել, ինչը հնարավորություն կտա նորմալ բանակցություններ վարել, ավարտել այդ բանակցությունները, և եթե հաջողություն լինի, հասնել մեր նպատակներին: Կարծում եմ`շատ լավ հնարավորություն ունեն համանախագահները, որպեսզի կարողանան հետաքննել բոլոր այն դեպքերը, որոնք տեղի ունեցան մինչ բանակցություները և բանակցություններից հետո, և հանրությանը ներկայացնել, թե վերջապես ինչ է կատարվում: Մենք պատրաստ ենք ամենայն աւջակցություն ցուցաբերելու, մենք պատրաստ ենք մեր պարտավորությունները կատարելու: Մենք միշտ էլ ցանկացել ենք, որ մեր զինվորները չզոհվեն: Մենք միշտ ցանկացել ենք, որ խաղաղության պրոցեսը ամրապնդվի»,- նշեց Ս.Սարգսյանը:
Նախագահի խոսքերով` կարծես թե եկել է ժամանակը, որ կողմերի նախագահները հստակ պատասխան տան` ինչպե՞ս են իրենք օգտագործում բանակցային այդ փուլը, որն է նրանց նպատակը` արդյունքի հասնե՞լը, թե՞ բանակցություններ վարելու քողի տակ ռազմական գործերի, ռազմական լուծումների նախապատրաստվելը:
«Ասածս չի նշանակում, որ եթե բանակցություններ են վարվում, ապա զինված ուժերի մարտունակության վրա չպետք է աշխատել: Ասածս այն է, թե պրոցես է արդյոք այս բանակցությունները, թե նպատակին հասնելու միջոց: Կարծում եմ, որ Սոչիի հանդիպումը տարբերվում էր այլ հանդիպումներից: Եւ շատ կցանկանայի, որ իմ այս պատկերացումները իրականությանը համապատասխանեին: Կցանկանայի որպեսզի երևութական չլինի այն, ինչի մասին մենք խոսեցինք և ինչի մասին մենք հայտարարեցինք: Եթե շատ կարճ ձևակերպեմ, պետք է ասեմ հետևյալը. բանակցությունները շարունակվում են, կա փաստաթուղթ, փաստաթղթի վրա աշխատում ենք, սա երկարաժամկետ պրոցես է, և կան կարճաժամկետ պայմանավորվածություններ, որոնք մենք պարտավոր ենք կատարել»,- հայտնեց Ս.Սարգսյանը:
/Panorama.am/
|