«Գարնանը, նախ, ակտիվ աշխատանք եմ ակնկալում ինչպես գյուղում, այնպես էլ քաղաքում: Պրոբլեմները շատ են, ու այս խնդիրները պետք է լուծվեն»,- Ծաղկաձորում «Գյուղատնտեսության զարգացման 2011 թ. ծրագրերը և խնդիրները» թեմայով խորհրդաժողովից հետո լրագրողների հետ ճեպազրույցում ասաց ՀՀ Նախագահ Սերժ Սարգսյանը` պատասխանելով գարնանը ներքաղաքական զարգացումների ակնկալիքների վերաբերյալ:
Երկրի ղեկավարն ընդգծեց, որ խնդիրների լուծման համար արդեն կան ծրագրեր, որոնք նախատեսում են բազմաթիվ փոփոխություններ: «Այդ փոփոխությունները պետք է արդյունք տան, տեսանելի լինեն»,- ասաց երկրի ղեկավարը, նկատելով, որ ֆինանսատնտեսական ճգնաժամն ու տարածաշրջանում տեղի ունեցած իրադարձությունները 2010-ին գյուղատնտեսության համար հավելյալ դժվարություններ ստեղծեցին»:
«Շատ օրինաչափ է, որ մարդիկ փոփոխություններ են ուզում, և օրինչափ է մեր ցանկությունը, այդ փոփոխություններն արագացնել: Շարունակելու ենք փոփոխությունները, մանավանդ որ տեսնում ենք, որ եթե ցանկությամբ ու կամքով սկսում ենք մի բան անել, արդյունքները տեսանելի են լինում»,- ասաց ՀՀ Նախագահը` որպես օրինակ նշելով կենսաթոշակային համակարգում արված փոփոխությունները, իսկ այս տարվա երկու ամիսների արդյունքները, ըստ նրա, խոսում են այն մասին, որ իրոք հնարավոր է պրոբլեմները լուծել, տնտեսել միլիարդավոր գումարներ, որոնք կարող են ուղղվել ցանկացած սոցիալական խնդրի լուծման:
/Panorama.am/
|
