Հայերի ցանկությունը եղել և մնում է, որպեսզի ԱՄՆ նախագահը Հայոց ցեղասպանության զոհերի հիշատակի օրն իր ավանդական ուղերձում արտաբերի «ցեղասպանություն» բառը: Լրագրողների հետ հանդիպման ժամանակ այսօր նշեց ՀՀ նախագահ Սերժ Սարգսյանը` հավելելով, որ ինքն անձամբ է խնդրել ԱՄՆ նախագահից` վարվել այդ կերպ:
Ի պատասխան լրագրողի հարցին, թե ինչ ակնկալիք կա ԱՄՆ նախագահի այս տարվա ուղերձից, հանրապետության ղեկավարը մասնավորապես պատասխանեց. «Եթե հարցնում եք մեր ցանկության մասին, ապա, բնականաբար, մեր ցանկությունը միշտ եղել և մնում է այն, որ Միացյալ Նահանգների նախագահն ամենամյա իր ուղերձում շատ հստակ գնահատականներ տա և, իհարկե, արտաբերի ցեղասպանություն բառը։ Այս մասին ես մեկ անգամ չէ, որ արտահայտվել եմ և հիմա կարող եմ ասել, որ ժամանակին անձամբ եմ խնդրել Միացյալ Նահանգների նախագահին, որպեսզի այդ բառը արտասանի։ Բայց ցանկությունն ու իրականությունը տարբեր բաներ են, և ամենից լավ բանն այն է լինում, երբ որ քո ցանկությունը համընկնում է իրականության հետ։ Ցանկանանք, որ այս անգամ այդպես լինի»:
Միաժամանակ նախագահ Սարգսյանը նշեց, որ եթե դա իրականություն չդառնա, ապա վհատվելու կարիք չկա: «Եթե այդպես չլինի, մենք վհատվելու հիմք չպիտի ունենանք և մշտապես դրա համար պետք է պայքարենք»,- ընդգծեց նա։
/Panorama.am/
|