1827թ. Օշականի ճակատամարտի ընթացքում Մայր Աթոռ Սբ. Էջմիածինը պարսկական հարձակումից փրկած ռուս զինվորների հիշատակը հավերժացնող հուշահամալիրը կբարեկարգվի: «Պատվի գործ» հայ-ռուսական բարեգործական կազմակերպության կողմից նախաձեռնած` ռուսական համայնքի ներկայացուցիչների հանդիսավոր ընդունելության ընթացքում ներկայացվել է հուշահամալիրի բարեկարգամ ներկայիս փուլի մասին պատմող աուդիոսլայդշոուն: Այս մասին տեղեկացնում է «Պատվի գործ» հայ-ռուսական բարեգործական կազմակերպության մամուլի կենտրոնի ղեկավար Աշոտ Պողոսյանը:
Հիշեցնենք, որ հուշահամալիրի վերածննդի նախաձեռնությունը պատկանում է Հայաստանում Ռուսաստանի դեսպան Վյաչեսլավ Կովալենկոյին և իրականացվում «Պատվի գործ» հայ-ռուսական բարեգործական կազմակերպության կողմից: Կազմակերպության նախագահ Անդրանիկ Նիկողոսյանն ընդգծեց երկու ժողովուրդների հերոսական անցյալի մասին հուշերը երիտասարդ սերնդին փոխանցելու անհրաժեշտությունը: Ռուսական համայնքի ներկայացուցիչներն, իրենց հերթին, բարձր են գնահատել կատարած աշխատանքները` ընդգծելով, որ հայ և ռուս ժողովուրդների պատմական հիշողության պահպանումն ու արդիականացումը վերջին շրջանում իրականացվում է հավուր պատշաճի:
Նշենք, որ Օշականի ճակատամարտը Ռուս-պարսկական պատերազմի հերոսական էջերից է: 1827թ. օգոստոսի 17-ին պարսից շահ Աբբաս Միրզայի զորքերը պաշարել էին Էջմիածինը, որի փրկությանն էր շտապում ռուսական զորախումբը` Ա. Կրասովսկու գլխավորությամբ: Պարսիկները ճակատամարտը տանուլ են տվել: Որոշում է ընդունվել Օշականում ռուս զինվորների հիշատակը հավերժացնող հուշահամալիր կանգնեցնել, որի բացումը կայացել է 1834թ.: Ներկայում Օշականի հուշահամալիրը հայտնվել էր անմխիթար վիճակում: «Օշականի հուշահամալիրի վերածնունդ» ծրագրի շրջանակներում նախատեսվում է դրան նոր շունչ հաղորդել:
Սա «Պատվի գործ» կազմակերպության երկրորդ լայնամաշտաբ ծրագիրն է: Առաջինը` Գյումրիում Պատվո Բլրի բարեկարգումն էր:
/Panorama.am/
| 
