ԱՄՆ Պետքարտուղարությունը ներկայումս սերտ կապի մեջ է ԱՄՆ Կոնգրեսի Ներկայացուցիչների պալատի անդամների հետ և բանակցում է, որպեսզի թիվ 252 բանաձևը Կոնգրեսի լիագումար նիստի օրակարգ չընդգրկվի: Այդ մասին դեկտեմբերի 20-ին ԱՄՆ Պետքարտուղարությունում տեղի ունեցած ավանադական ճեպազրույցի ժամանակ հայտարարել է ԱՄՆ Պետքարտուղարի օգնական Ֆիլիպ Քրոուլին (Philip J. Crowley)` պատասխանելով հարցին` արդյո՞ք ԱՄՆ Պետքարտուղար Հիլարի Քլինթոնը բանաձևի հետ կապված հարցի վերաբերյալ զանգեր կատարել է Պալատի անդամներին:
«Տիկին Քլինթոնի մասին ոչինչ չեմ կարող ասել, բայց ես կապվել եմ Պալատի անդամների հետ: Մեր դիրքորոշումը այդ հարցի վերաբերյալ շատ հստակ է` մենք դեմ ենք բանաձևի ընդունմանը», -հավելել է Քրոուլին, տեղեկանում ենք ԱՄՆ Պետքարտուղարության լրատվական ծառայությունից:
Հիշեցնենք, որ ԱՄՆ Ներկայացուցիչների պալատի խոսնակ Նենսի Փելոսիի նախաձեռնությունը` դեկտեմբերի 18-ին Հայոց ցեղասպանության մասին թիվ 252 բանաձևը մտցնել ԱՄՆ Կոնգրեսի Ներկայացուցիչների պալատի լիագումար նիստի օրակարգ չստացվեց, քանի որ Կոնգրեսի աշխատանքները երկարեցին։ Այնուհետև Փելոսին հայտարարեց, որ դա ամենայն հավանականությամբ տեղի կունենա դեկտեմբերի 21-ին, այսօր:
Նկատենք, որ Թուրքիայի իշխանությունները վարչապետ Էրդողանի ու արտգործնախարար Դավութօղլուի մակարդակով բազմիցս սպառնացել են ԱՄՆ վարչակազմին ԱՄՆ հետ հարաբերությունների վատացմամբ: Ավելին, Էրդողանը նամակ է հղել ԱՄՆ նախագահ Բարաք Օբամային` հորդորելով թիվ 252 բանաձևը չներառել Կոնգրեսի լիագումար նիստի օրակարգ:
/Panorama.am/
|