Վրաստանը փորձում է տարածաշրջանում մի յուրօրինակ միություն ստեղծել` «Կովկասյան տուն» անունով, դրանով փորձելով հակակշիռ ստեղծել Ռուսաստանին: Այս մասին այսօր լրագրողների հետ հանդիպման ժամանակ ասաց ԵՊՀ գիտակազմակերպչական բաժնի վարիչ Ալիկ Ղարիբյանը:
Ըստ նրա, Վրաստանը պաշտոնապես առաջարկում է «Կովկասյան տան» գաղափարը, երկրի նախագահը իր հայտարարություններում բազմիցս խոսել է այդ մասին, ադրբեջանական կողմը` Ադրբեջանի ԱԳՆ-ի միջոցով հավանություն է տվել գաղափարին, հայկական կողմից պատասխան չկա:
Ա. Ղարիբյանը նշեց, որ «Կովկասյան տան» գաղափարը որևէ մտավախություն չպետք է առաջացնի: Ըստ բաժնի վարիչի, այս քայլը Սահակաշվիլու կողմից արվել է արևմտյան կառույցներին ևս մեկ անգամ հաճոյանալու համար: Բայց Վրաստանը, նրա խոսքով, մի բան հաշվի չի առել. Ռուսաստանը երբեք դիրքերը չի զիջի Կովկասում:
Ըստ բանախոսի, այսպիսի միության մասին Վրաստանը խոսել էր դեռևս 90-ականներին` ԽՍՀՄ-ի փլուզումից հետո: «Նպատակը մեկն էր: Ներքին կարգով համագործակցելով Թուրքիայի հետ` անջատվել Ռուսաստանից: Դա կարճատև ընթացք էր ու չէր կարող ապագա ունենալ»,- ասաց Ա. Ղարիբյանը, սակայն ավելացրեց, որ նման հայտարարություններ արվում են մինչ օրս:
Իսկ ասուլիսին ներկա Եվրոպական տարածաշրջանային ակադեմիայի միջազգային հարաբերությունների ամբիոնի վարիչ Հովհաննես Ալեքսանյանը նշեց, որ նման ընդհանրական կառույցների մեջ հայերը մշտապես եղել են փոքրամասնության դերում` վրացիների ու թուրքերի կողքին: Նա հիշեցրեց, որ այս միտքը ապագա չունի, քանի որ դժվար է բազմազան ազգեր ունեցող Կովկասում ստեղծել մեկ տուն: «Գաղափարն անհեռանկարային է նաև մեկ այլ պատճառով: Անհնար է միմյանց միջև խնդիրներ ունեցող Կովկասյան երկրների միջև համերաշխ տուն կառուցել»,- եզրափակեց Հ. Ալեքսանյանը:
/Panorama.am/
|