«Ղարաբաղյան կողմը ողջունում է ցանկացած տիպի զեկույց, որը լինում է օբյեկտիվ և արտացոլում է առկա իրական վիճակը: ԵԱՀԿ ՄԽ համանախագահների կողմից հրապարակված ամփոփ զեկույցում կան ձևակերպումներ, որոնց հետ մենք չենք կարող համաձայն լինել»,- մեկնաբանելով ԵԱՀԿ ՄԽ համանախագահների կողմից հրապարակված զեկույցը՝ Panorama.am-ին ասաց ԼՂՀ նախագահի աշխատակազմի հասարակայնության հետ կապերի գլխավոր վարչության պետ Դավիթ Բաբայանը:
«Սկսենք նրանից, որ արցախյան կողմը այդ 7 շրջանները չի դիտում որպես օկուպացված կամ ռազմակալված տարածքներ: Համանախագահների կողմից օգտագործվող տերմինաբանությունը հնուց եկած տերմինաբանություն է, որը չի համապատասխանում բուն իրական իրավիճակին, քանզի այդ տարածքները ազատագրվել են, այլ ոչ թե օկուպացվել»,- ասաց նա:
Արցախցի պաշտոնյաի համոզմամբ՝ այդ տարածքները նույնիսկ ռազմական առումով չի կարելի համարել օկուպացված, քանի որ օկուպացված կարող է համարվել կանխորոշված քայլը՝ ուղղված այս կամ այն տարածքը գրավելուն, իսկ Արցախը նման նպատակ չի ունեցել, հետևաբար, խորքային իմաստն ինքնին չի համապատասխանում որակումներին:
«Կան խնդիրներ, որոնց մասին այդ զեկույցում պետք է ավելի խորքային ձևով ներկայացվեր: Նախ նշեմ, որ 2005 թվականի համեմատ, մասնավորապես, Քաշաթաղի և Շահումյանի շրջաններում անհամեմատելիորեն փոխվել է:
Կառուցվում են ենթակառուցվածքներ, փախստականների համար բնակելի տներ կառուցվում, սոցիալական նշանակության օբյեկտներ, ջրամբարներ, ՀԷԿ-եր, բնակչությունը գնալով աճում է: Միայն 2010 թվականի վերջին, մոտ 200 ընտանիք ապաստան է գտել Քաշաթաղի շրջանում»,- տեղեկացրեց Դ. Բաբայանը:
Եթե համանախագահները ցանկանում էին համեմատականներ տանեին տարիներ առաջ և այսօր առկա իրավիճակին, ապա ըստ պաշտոնյայի՝ ճիշտ կլիներ համեմատել 1994-95 թվականներին և այսօրվա առկա իրավիճակը, քանի որ այդպես իրավիճակն ավելի ռեալ կուրվագծվեր:
«Մենք դեռևս առավել մանրամասն ուսումնասիրում ենք զեկույցն իր ամբողջական տեսքով, և հետագայում առավել ընդգրկուն կներկայացնենք արցախյան կողմի տեսակետը»,- եզրափակեց Դ, Բաբայանը:
Նշենք, որ դաշտային առաքելության զեկույցում համանախագահներն արձանագրել էին, որ 2005 թվականից ի վեր բնակչության էական աճ չի եղել: Բնակիչները` մեծամասամբ ազգությամբ հայ, այս տարածքներ են տեղափոխվել Ադրբեջանի այլ շրջաններից:
/Panorama.am/
|
