Մոսկվան փորձում է այնպես անել, որ Հայաստանի և Ադրբեջանի նախագահների յուրաքանչյուր հանդիպում ավարտվի որևէ արդյունքով: Այսօր լրագրողների հետ հանդիպմանը նման կարծիք հայտնեց ռազմական փորձագետ, ՊՆ հանրային խորհրդի անդամ Դավիթ Ջամալյանը: Անդրադառնալով Սոչիում կայացած հանդիպմանը, նա նշեց, որ պատահական չէ, որ այս անգամ ևս պայմանավորվածություն է ձեռք բերվել գերիների փոխանակման հարցում: «Դա ռուսական դիվանագիտության համար փոքր հաղթանակ չէ»,-գնահատեց բանախոսը, ապա հիշեցրեց, որ ի տարբերություն Ադրբեջանի, հայկական կողմը շահագրգրված չէ ռազմական գործողություններով և հումանիտար որևէ նախաձեռնություն նրա համար շահեկան է:
«Ադրբեջանական կողմի համար խնդիրն այլ տրամաբանություն ունի: Փորձում է գերիների փոխանակման հարցով համագործակցել, բայց պահպանել նաև լարումը: Բաքուն լուրջ հիմքեր ունի ձախողելու բանակցային նախաձեռնությունները, սակայն դրա մեջ մեղադրելով հայկական կողմին», - ասաց նա, տեսակետ հայտնելով, որ Ադրբեջանը պատրաստվում է պատերազմի, բայց պարզ չէ, թե երբ կգնա այդ արկածախնդրության:
Ջամալյանի խոսքով, ժողովրդավարացման գործընթացների դանդաղ տեմպը արդարացնելու համար ադրբեջանական կողմը միշտ մատնացույց է անում Արցախի խնդիրը, մինչդեռ դա, ըստ փորձագետի, ալիևյան դիկտատուրան հիմնավորելու մի անհաջող փորձ է: Ռազմական հոգեբանը նշեց, որ Բաքվի քաղաքական հաշվարկներում շատ մեծ դեր է հատկացվում դիպուկահարներին և դիվերսիոն խմբերին, սակայն միաժամանակ նկատեց, որ ադրբեջանցի դիպուկահարների ցանկացած գործողություն կասեցվում է և համարժեք պատասխան ստանում հայկական զինված ուժերի կողմից:
/Panorama.am/
|
