«Փաստահավաք խմբի զեկույցն իհարկե իդեալական չէ, սակայն դրույթները հիմնականում հակասությունների մեջ են մտնում ադրբեջանական քարոզչության հետ»,- մեկնաբանելով ԵԱՀԿ ՄԽ փաստահավաք առաքելության հրապարակած զեկույցը՝ Panorama.am-ին ասաց ԱԺ պատգամավոր, ՀՀԿ մամուլի խոսնակ Էդուարդ Շարմազանովը:
Նրա խոսքերով, երբ սկզբանական շրջանում առաջարկ եղավ ազատագրված 7 շրջաններում փաստահավաք առաքելություն իրականացնել, հայկական կողմը հայտարարեց, թե դա ընդունելի կլինի, եթե նույն գործընթացն իրականացվի նաև Ադրբեջանի կողմից օկուպացված շրջաններում՝ Շահումյան, Մարտունաշեն, Մարտակերտի արևելյան շրջաններում:
«Զեկույցում նշված է, որ նման դաշտային առաքելություն պետք է իրականացվի նաև վերոնշյալ շրջաններում: Սա խոսում է այն մասին, որ հայկական կողմի և ԵԱՀԿ ՄԽ փաստահավաք առաքելության մոտեցումները համահունչ են միմյանց, ու սա այն դեպքում, որ ադրբեջանցիները դրա հնարավորությունը բացառում էին»,- ասաց պատգամավորը:
Նա նշեց, թե զեկույցում հստակ նշվում է հակամարտության բոլոր կողմերի ներգրավածության մասին, որի մեջ, բնականաբար, առաջին հերթին վերջիններս նկատի ունեն արցախյան կողմին՝ փաստացի ընդունելով, որ հակամարտության կողմ է նաև Արցախի Հանրապետությունը:
«Փաստահավաք առաքելության զեկույցը մերկացրեց ադրբեջանական քարոզչությունը, ինչը դրսևորվում է նրանց կողմից՝ Արցախի մասին կեղծ տեղեկատվության տարածմանը: Ադրբեջանը նշում էր, թե 7 շրջաններում ակտիվորեն ահաբեկչական խմբավորումներ են գործում կամ այդտեղով անցնում են թմրամիջոցների տարանցիկ ուղիներ: Դաշտային առաքելությունն իր զեկույցով նշում է, որ այդ տարածում մարդիկ ապրում են իրենց բնականոն կյանքով՝ միաժամանակ ընդգծելով, որ հայաթափվել են Ադրբեջանում ապրող հայերը, որոնք հետագայում բնակություն են հաստատել նաև ազատագրված շրջաններում»,- ասաց ՀՀԿ մամուլի խոսնակը:
Նրա համոզմամբ, զեկույցում խոսվում է հիմնախնդիրը խաղաղ ճանապարհով լուծելու մասին, ինչը լիովին հակասում է Ադրբեջանի կողմից հաճախակի հնչող ռազմական հռետորաբանությանը:
«Փաստաթղթում խոսք է գնում այն մասին, որ կողմերը պետք է զերծ մնան ռազմական լուծումից, ինչպես նաև՝ դատապարտելի է դիպուկահարների՝ առաջնային գծում գործելու փաստը: Այսօր բոլորին է հայտնի, որ Ադրբեջանն է, որ այդպես էլ չի համաձայնվում դիպուկահարներին հեռացնել առաջնային գծից:
Վերջին ժամանակներս ադրբեջանցի որոշ պաշտոնյաներ անհեթեթ հայտարարություններ հնչեցրեցին Արցախի օդանավակայանի շահագործման դեպքում Ադրբեջանի կողմից իրականացվող հնարավոր խոցման մասին: Միջորդները մեկ անգամ ևս ընդգծել են, որ նման հայտարարություններն ինքնին դատապարտելի են»,- հավելեց Է. Շարմազանովը:
Խորհրդարանականի համոզմամբ, զեկույցը բացահայտում է ադրբեջանական քարոզչության կեղծ լինելը, ցույց տալիս, որ Ադրբեջանի իրական նպատակը ոչ թե բանակցությունների միջոցով արդյունքի հասնելն է, այլ խնդիրը փակուղի տանելն ու միջազգային հանրությանը մոլորության մեջ գցելը: Զեկույցում փաստվում է, որ Արցախը հակամարտության կողմ է»,- եզրափակեց ՀՀԿ-ական գործիչը:
Նախորդիվ` http://www.panorama.am/am/region/2011/03/24/insk-co-chairs/
/Panorama.am/
| 
