Շվեյցարիայի Համադաշնության նախագահ Միշելին Կալմի-Ռեյի հետ համատեղ ասուլիսում Հայաստանի Հանրապետության նախագահ Սերժ Սարգսյանը պատասխանել է Panorama.am-ի հարցին: Ստորև ներկայացնում ենք հարց ու պատասխանի սղագրությունը:
- Ինչպե՞ս կմեկնաբանեք օրեր առաջ Ադրբեջանի քաղավիացիայի պետական վարչության, այդ երկրի արտաքին գործերի նախարարության և մի շարք այլ գերատեսչությունների հայտարարություններն այն մասին, որ իրենք կոչնչացնեն այն բոլոր ինքնաթիռները, որոնք կփորձեն վայէջք կատարել Ստեփանակերտի օդանավակայանում, նկատի ունենալով Երևան-Ստեփանակերտ քաղաքացիական չվերթների սպասվելիք վերականգնումը:
-Լեռնային Ղարաբաղի բնակչությունն իրավունք ունի օգտվելու օդային տրանսպորտի ծառայություններից: Այստեղ որևէ կասկած լինել չի կարող: Կասկած լինել չի կարող նաև, որ ինչպես Լեռնային Ղարաբաղի իշխանությունները, այնպես էլ Հայաստանի իշխանությունները, պետք է ջանքեր գործադրեն, որպեսզի այս խնդիրը համաձայնեցնեն պատկան մարմինների հետ: Եվ վստահ եմ, որ այս գործընթացն ունենալու է իր դրական ավարտը: Ինչ վերաբերում է հայտարարությանը, ապա այդպիսի հայտարարություններ աշխարհի մերօրյա պատմության մեջ եղել են և քիչ չեն եղել: Բայց այստեղ մի բայց կա: Այդ հայտարարությունները միշտ հնչել են ահաբեկչական կազմակերպությունների կողմից, և որևիցե պետության կողմից այդպիսի հայտարարություն չի հնչել: Պետության կողմից այդպիսի հայտարարություն հնչեցնելը, ինչպես ասեմ` մառազմ է, հիվանդ մարդկանց ելույթներ են, ժամանակավրեպ, անցած բաներ են: Ի՞նչ է նշանակում, երբ պետությունն ասում է, որ ես կոչնչացնեմ քաղաքացիական ինքնաթիռը: Այսինքն` այս հայտարարությունը մեկնաբանելու կարիք չկա: Բայց ես կարող եմ մեկ բան հայտարարել. այդ ավիաթռիչքի առաջին ուղևորը ես եմ լինելու` Հայաստանի Հանրապետության նախագահը: Կարծում եմ` Շվեյցարիայի Համադաշնությունը ամբողջովին սատարում է մեզ:
/Panorama.am/
| 
