Հայաստանի նախագահի նկատմամբ վստահության միջին գնահատականը 2006 թ. կազմել է 2.9 (սանդղակի առավելագույն 5 միավորից), իսկ 2009 թ. 3.3 միավոր: Այս ցուցանիշներն այսօր Հայաստանում, Վրաստանում և Ադրբեջանում 2009 թ-ին միաժամանակյա անցկացված հետազոտական արդյունքների շնորհանդեսի ժամանակ ներկայացրեց Հետազոտական ռեսուրսների կովկասյան կենտրոնի (ՀՌԿԿ) հայաստանյան տնօրեն Հեղինե Մանասյանը:
«Հայաստանում սոցիալ-քաղաքական հաստատությունների նկատմամբ վստահության մակարդակի գնահատականների համադրումը 2004-2009 թթ. համար բացահայտում է դրա աճի միտումը հաստատությունների մեծ մասի համար` վկայելով երկրում պետական կայացումը»,- նշեց Հ. Մանասյանը:
Ըստ հարցումների, Վրաստանի նախագահի նկատմամբ վստահությունը 2004 թ. 4.4 միավորից նվազելով 2007 թ. կազմել է 2.9 միավոր, իսկ հետագա տարիներին կրկին աճելով 2009 թ. հաստատվել է 3.5 միավորի վրա:
Ընդ որում, Հարավկովկասյան բոլոր երկրներում խորհրդարանի հանդեպ վստահությունը զիջում է նախագահական ինստիտուտի հանդեպ վստահությանը: 2009 թ. խորհրդարանի հանդեպ վստահությունը Հայաստանում, Վրաստանում և Ադրբեջանում միջինում եղել է համապատասխանաբար 2.7, 3.2 և 2.9:
Նշենք, որ երեք հանրապետություններում հարցումն անցկացվել է միասնական ընտրանքային մեթոդաբանությամբ շուրջ 6000 տնային տնտեսություններում: 2009թ. բոլոր երկրներում էլ որպես ընտրանքի շրջանակ օգտագործվել են ընտրական ցուցակները: Հարցվողները պատասխանել են 120 հարցերի` Հարավային Կովկասի երկրներում սոցիալական, քաղաքական և տնտեսական զարգացումների վերաբերյալ:
/Aysor.am/
| 
