ՀՀ նախագահ Սերժ Սարգսյանն այսօր հանդիպեց Հանրային խորհրդի անդամների հետ: Ինչպես լրագրողների հետ զրույցում հայտնեց Հանրային խորհրդի անդամ, բնապահպան Կարինե Դանիելյանը, հանդիպման ընթացքում քննարկված հարցերից մեկը վերաբերել է Երևանում առկա քաղաքաշինական խնդիրներին` Երևանի քաղաքաշինությունը և բացասական ազդեցությանը էկոլոգիական խնդիրների վրա:
«Նախագահը նոր էր ընտրվել, երբ հանդիպեցինք ու ներկայացրեցինք քաղաքաշինական բնագավառում առկա խնդիրները: Խոստում եղավ, որ շատ բան կփոխվի: Իրոք, շատ բան փոխվել է, մենք գոհ ենք` քաղաքը ծաղկապատում են, մաքրում են, սանմաքրումն էլ լավ է, շենքերն են լվանում: Շատ բան է փոխվել, բայց քաղաքաշինության խնդիրը մնացել է: Մենք հենց այդ խնդիրն էլ բարձրացրեցինք այս հանդիպման ընթացքում: Բացատրություն եղավ, որ դա կապված է ՀՆԱ-ի հետ, փոխելը դժվար է»,- ասաց ՀԽ անդամը:
Ըստ Կ.Դանիելյանի` խոսք է գնացել տասը տարիների ընթացքում Երևանում իրականացվող «հակաէկոլոգիական քաղաքաշինության» մասին: Մասնավորապես, ըստ բնապահպանի` նշվել է, որ այն արվել է Մոսկվայի բացասական օրինակով:
«Մոսկվայում իրականացվում է կետային կառուցապատում, որի արդյունքում այսօր Ռուսաստանի մայրաքաղաքը տրանսպորտային, կոմունիկացիոն կոլապսի մեջ է: Երևանը նույն ճանապարհին է: Մեր բնակլիմայական պայմաններում ազդեցությունը շատ ավելի բացասական է», - նշեց բանախոսը:
Կ. Դանիելյանն ասաց, որ իրենք այսօր հենց այդ հարցն են բարձրացրել Նախագահի հետ հանդիպման ժամանակ, քանի որ նախարարության, քաղաքապետարանի հետ աշխատանքը արդյունք չի տվել:
«Մենք դիմեցինք Նախագահին, քանի որ մեզ անհրաժեշտ է օժանդակություն: Նա խոստացավ օժանդակում ոչ այն խիստ կաղապարով, որ մենք էինք առաջարկում` Նախագահին առընթեր հատուկ հանձնաժողովի ստեղծում, բայց օժանդակություն խոստացավ»,- ասաց Հանրային խորհրդի անդամը, նշելով, որ հանդիպման ընթացքում մի քանի առաջարկություններ են հնչել: /Aysor.am/
|
