Ամերիկյան «The wall street journal»-ը հրապարակել է երկրների հեղափոխական վարկանիշային ցուցակ, որում Ադրբեջանը տասներորդ հորիզոնականում է, իսկ Հայաստանն այդ ցանկում չկա: Հեղափոխությունների ինդեքսը կազմվել է երեք ցուցանիշներով` կաշառակերություն, մարդկային ներուժի զարգացում և սոցիալական պայմաններ:
«Նորավանք» գիտակրթական հիմնադրամի տնօրեն, վերլուծաբան Գագիկ Հարությունյանը լրագրողների հետ հանդիպմանն ասաց, որ վարկանիշային այս ցուցակը պատահական երևույթ չէ:
«Վերջին տարում հեղափոխական ներուժը տարբեր երկրներում աճել է, անգամ Եվրոպայում` կապված միջին խավի անկման հետ, աճել է սոցիալական լարվածությունը»,- նշեց Գ. Հարությունյանը:
Հայաստանն այդ ցանկում չկա, քանի որ, ըստ Գ. Հարությունյանի, չի կարող հաշվարկվել զուտ տեխնիկական պատճառներով: «Առաջին 16 տեղերում 9 երկիր կա Աֆրիկայից, 16-րդ տեղը Եգիպտոսն է զբաղեցնում: Որոշ փորձագետներ Ադրբեջանից անգամ գտնում են, որ սխալ հաշվարկ է, և Ադրբեջանը պետք է լիներ 5-րդ տեղում»,- ներկայացրեց վերլուծաբանը:
Հանդիպմանը ներկա Հայաստանի ԳԱԱ արևելագիտության ինստիտուտի տնօրեն Ռուբեն Սաֆրաստյանը լուրջ չի համարում ցուցակները:
«Եթե վերանանք նման ցուցակներից, պետք է արձանագրենք, որ Ադրբեջանն իր սոցիալական լարվածության մակարդակով իսկապես բավական ծանր վիճակում է: Ադրբեջանում հորից որդուն փոխանցված իշխանությունը ևս ծանր է դիտարկվում հասարակության կողմից»,- ասաց թուրքագետը` հավելելով, որ հեղափոխական տրամադրությունները շատ բարձր են Ադրբեջանում:
Նշենք, որ Ռուսաստանն այդ ցանկում զբաղեցնում է 40-րդ, Թուրքիան` 36-րդ հորիզոնականը: /Aysor.am/
|