Երևան-Ստեփանակերտ իրականացվելիք չվերթի վերաբերյալ Ադրբեջանի ռազմատենչ հայտարարություններն ու սպառնալիքները, ռազմական փորձագետ Արծրուն Հովհաննիսյանն, այսօր լրագրողների հետ հանդիպման ժամանակ պետական ահաբեկչություն որակեց: «Այս չվերթի հետ կապված ադրբեջանական հոխորտանքներնը հեռուն գնացող սադրանքների ավելի խորացված տարբերակն են, որը այլ կերպ քան պետական ահաբեկչություն չի կարելի որակել»,-ասաց բանախոսը:
Ռազմական փորձագետը նշեց, որ ուսումնասիրությունների համաձայն, աշխարհում դեպք չի գրանցվել, երբ դիտմամբ խոցվի, կործանվի քաղաքացիական ինքնաթիռ: Իսկ Ադրբեջանի պետական գերատեսչություններից մեկը` քաղաքացիական ավիացիայի վարչությունը, որը, ի դեպ, իրավասու չէ այդ հարցերով զբաղվելու, հայտարարել է Ադրբեջանի նման մտադրության մասին: Ընդ որում, փորձագետը նշեց` ադրբեջանական կողմը չի հաշվարկել, որ այդ քայլով ադրբեջանցիները նույն «հաջողությամբ» հնարավոր է վնասեն նաև ինքնաթիռում գտնվող այլ երկրների քաղաքացիների, քանի որ չվերթից օգտվել ցանկացողների թվում նաև օտարերկրացիներ կան:
Բացի այդ, նա նշեց, որ ադրբեջանական այդ քայլը արժանի պատասխան է ստանալու, քանի որ հայկական կողմը տեխնիկապես ավելի լայն հնարավորություններ ունի Ադրբեջանի տարածքից թռչող քաղաքացիական ինքնաթիռները խոցելու ու հակահարվածի համար: Փորձագետի հավաստմամբ, այդ քայլն անելու հնարավորություն է տալիս նաև երկրի աշխարհագրական դիրքը: Panorama.am-ի հարցին, որ ի վերջո, փորձագետը հնարավոր համարո՞ւմ է ադրբեջանական կողմից նման հանդգնություն, բանախոսը նշեց, որ ահաբեկչական տարբերակով հնարավոր է համարում նման քայլ:
Ասուլիսին ներկա քաղաքագետ Հրանտ Մելիք-Շահնազարյանը նույնպես պատասխանելով հարցին նշեց, որ Ադրբեջանից ամեն ինչ հնարավոր է սպասել, քանի որ ադրբեջանական մենթալիտետին դա խորթ չէ: Նա նույնպես նշեց, որ այս պարագայում գործ ունենք ահաբեկչության հետ ու Ադրբեջանը արդեն տեղեկատվական ահաբեկչություն է կատարել նման հայտարարություններ իրեն թույլ տալով: Մելիք-Շահնազարյանի համար, սակայն, ուրախալի է այն փաստը, որ հայ հասարկությունը չի տրվել ադրբեջանական սադրանքին ու ի հակադրություն սպառնալիքների, շատ մարդիկ են ցանկանում լինել այդ ինքնաթիռում:
Բանախոսները նաև ավելացրին, որ ինքնաթիռում բացի հասարակ քաղաքացիներից ցանկանում են լինել հայտնի լրագրողներ, հասարակական գործիչներ, անվանի մարդիկ, ովքեր ուզում են Ադրբեջանին ցույց տալ, որ ոչ մի սպառնալիք չի կարող ազդել: Իսկ ռազմական փորձագետը հատկապե նշեց, որ այդ չվերթները Արցախի համար լուրջ խթան կարող են հանդիսանալ ու այդ խթանը հաշվի առնելով` Ադրբեջանի սադրանքը հասկանալի է: «Սադրել, սպառնալ, թույլ չտալ, որ Արցախը զարգանալու ևս մեկ հնարավորություն ունենա: Այ սրանից է վախենում Ադրբեջանը»,-եզրափակեց ռազմական փորձագետը:
/Panorama.am/
|