«ՀՀ նախագահի ելույթին անդրադառնալիս պետք է արձանագրենք, որ այն, ինչպես նրա նախորդ ելույթներն ու ուղերձները, ուղղված էին համայն հայությանը: Նախագահն իր ելույթում դեղատոմս առաջարկեց՝ հասարակության մեջ առկա բացասական երևույթները արմատախիլ անելու համար: Նախագահի ելույթը կոչ էր բոլոր պաշտոնյաներին՝ անկախ այն հանգամանքներից, թե վեջիններս հանրապետական են, այլ կուսակցությունների ներկայացուցիչներ, թե ընդհանրապես անկուսակցականներ»»,- անդրադառնալով ՀՀ նախագահի՝ նախօրեին հնչեցրած ելույթին՝ Panorama.am-ին ասաց ԱԺ պատգամավոր, ՀՀԿ խմբակցության անդամ Հովհաննես Սահակյանը:
Նրա խոսքերով՝ իր ելույթում, նախագահն անդրադարձ կատարեց ընդդիմությանը, նրանց գործելաոճին և կարևոր էր այն հատկապես այն հանգամանքը, որ նրանց անդրադառնալով՝ նախապես դասակարգեց տարբեր խմբերի:
«Բանն այն է, որ միանշանակ ասել, թե ընդդիմությունն այսպիսին է կամ այնպիսի այդքան էլ նպատակահարմար չէ, քանի որ ընդդիմության տարբեր ուժեր իրենց տարբեր ձևով են դրսևորում: Եվ նախագահն իր ելույթում հստակ դասակարգեց Հայաստանում գործող ըննդիմությանը:
Նախագահն ընդդիմությանն անդրադառնալով մեկ անգամ ևս ցույց տվեց, որ մենք նորմալ ենք վերաբերվում ընդդիմության կառուցողական քննադատությանը, առաջարկներին, հաշվի ենք առնում դրանք: Ու այն քննադատությունը, որն ուղղված է հանուն մեր երկրի բարօրությանը, դա մեզ համար միանգամայն ընդունելի է»,- ասաց Հ. Սահակյանը:
Այնուհետև խորհրդարանականը նշեց. «Մենք չենք ընդունում, երբ ամեն ինչ «սևացվում է», երբ ամեն ինչին ասվում է «ոչ» զուտ «ոչ» ասելու կամ ընդդիմություն երևալու համար: Դա չէ իրական ընդդիմությունը: Երկրի ղեկավարի ելույթում հնչեց ընդդիմության այն զանգվածի մասին գնահատականներ, ովքեր ամեն գնով փորձում են «սևացնել», «դիպչել» ազգային արժեհամակարգին: Կան բաներ, որոնք իրոք այս 20 տարվա ընթացքում ձեռք է բերվել մեծ զոհողությունենրի, արյան գնով, և այդ արժեքները պետք է ամեն գնով զերծ մնան, մեղմ ասած, ոչ պատշաճ վերաբերմունքից: Այս ելույթը որոշ խմբերի համար պետք է ազդակ լինի առ այն, որ դավաճանությունը ապրելակերպ չդարձնեն, այլ եթե իսկապես կա արված գործ, ապա դրա մասին պետք է խոսել, իսկ եթե կա թերացում, փորձել համընդհանուր ուժերով վերացնել այն»:
Պատգամավորը փաստեց, որ նախագահի ելույթում կար համակիրների ուղղված կոչ, որով նախագահը ասում էր, թե կուսակցության ցանկացած անդամ պետք է իմանա իր իրավունքներն ու, մանավանդ, պարտականությունները, ծառայի կուսակցության, երկրի շահերին, այլ ոչ թե հակառակն ակնկալի: «Մեզ համար կարևոր չէ այն հանգամանքը, թե որևէ պաշտոնի նշանակվող անձը կուսակցական է, թե ոչ: Մեզ համար կարևոր է, որ նշանակվող անձը աշխատի ի նպաստ իր ոլորտի և երկրի: /Panorama.am/
|