Հարավկովկասյան երկրներում` թերև տարբեր արագություններով, այնուամենայնիվ ժողովրդավարության ուղղությամբ դրական տեղաշարժ է նկատվում: Այս մասին հայտարարել է ԵԱՀԿ գործող նախագահ, Լիտվայի արտգործնախարար Աուդրոնյուս Աժուբալիսը:
Լիտվական DELFI գործակալությանը տված հարցազրույցում, ամփոփելով տարածաշրջան կատարած իր այցի արդյունքները, Ա. Աժուբալիսն ասել է. «Այսօր ԵԱՀԿ-ում Լիտվայի նախագահության 88-րդ օրն է: Այս ընթացքում ես ավելի քան 120 հանդիպում եմ ունեցել: Ես կցանկանայի ուշադրություն հրավիրել այս թվի և այն բանի վրա, որ արդեն այցելել եմ 12 երկիր: Կարծում եմ, որ բոլոր այցելությունները հավասարակշռված են եղել այն իմաստով, որ յուրաքանչյուր երկրում ես շեշտը դրել եմ զամբյուղում ընդգրկված բոլոր հարցերի վրա. ժողովրդավարություն, մարդու իրավունքներ և խոսքի ազատություն, անվտանգության, այդ թվում էներգետիկայի հարցեր, ինչպես նաև սառեցված հակամարտությունների լուծում»:
Անդրադառնալով հարավկովկասյան երկրներին` Լիտվայի արտգործնախարարն ասել է. «Եթե խոսենք վերջին` Հայաստան, Վրաստան, Ադրբեջան, շրջայցի մասին, ապա, այդ «դաշտային» շրջագայությունը հնարավորություն տվեց տեղեկություններ հավաքել ու գնահատել որոշակի տեղաշարժերի հնարավորությունը, տեղում հանդիպել Մինսկի խմբի համանախագահների հետ: Եթե դիտարկենք, թե ինչպես են իրադարձությունները զարգանում յուրաքանչյուր երկրում առանձին վերցրած, ապա կարելի է բարեփոխումների ու ժողովրդավարության ուղղությամբ որոշ դրական տեղաշարժ նկատել: Արագությունները տարբեր են, տարբեր են դժվարությունները, բայց դրական տեղաշարժ նկատվում է յուրաքանչյուր երկրում»:
Միաժամանակ, ըստ Ա. Աժուբալիսի, առկա հիմնախնդիրները խոչընդոտում են տարածաշրջանի երկրների առաջընթացին: «Գործընթացները կարող էին ավելի արագ լինել, եթե չլինեին լարվածության օջախներն ու սառեցված հակամարտությունները»,- նշել է նա:
/Panorama.am/
|