«Դիպուկահարների հեռացումը շփման գծից պետք է լինի երկուստեք»,- լրագրողների հետ հանդիպմանը, պատասխանելով Panorama.am-ի հարցին, թե ինչպե՞ս կմեկնաբանի ԵԱՀԿ գործող նախագահ Աուդրինյուս Աժուբալիսի հայտարարությունն ասաց ՀՀԿ խմբակցության քարտուղար Էդուարդ Շարմազանովը: Նա նաև հիշեցրեց, որ Հայաստանը միշտ էլ ասել է, որ պատրաստ է իրականացնել այն պայմանավորվածությունները, որոնք ձեռք են բերվել ` հայտնի երեք սկզբունքների հիման վրա, բայց բոլորի համար պետք է հստակ լինի այն գիտակցումը, որ միակողմանի որևէ բան տեղի չի կարող ունենալ:
Հիշեցնենք, ՀՀ արտգործնախարարությունում այսօր տեղի ունեցած ասուլիսի ժամանակ ԵԱՀԿ գործող նախագահ, Լիտվայի արտգործնախարար Ա.Աժուբալիսը հայտարարել էր, որ գուցե՞ Հայաստանն առաջինը հետ քաշի դիպուկահարներին: Թեպետ և հավելել, որ առաջարկը կրում է իմպրովիզացիոն բնույթ:
«Այն ֆոնի վրա, որ Սոչիում ձեռք բերված պայմանավորվածություններից հետո Ադրբեջանը դարձյալ դիմում է սադրիչ գործողությունների, այս պարագայում պարոն Աժուբալիսը պետք է շատ ավելի խիստ գնահատականներ հնչեցներ հենց Ադրբեջանի հասցեին»,- հայտարարեց Է.Շարմազանովն ու հավելեց` ժամանակն է, որ իրերն իրենց անուններով կոչենք: Բացի այս, Հայաստանի և Լեռնային Ղարաբաղի գնահատականները հակամարտության կարգավորման առումով համահունչ են և լուրջ պրեսինգի է պետք ենթարկել Ադրբեջանին, ընդգծեց ՀՀԿ-ական պատգամավորը, քանզի բոլորին է անկհայտ, որ այդ պետությունն է մշտապես խախտում պայմանավորվածությունները:
Հետաքրքրվեցինք նաև, թե որքանո՞վ էր կոռեկտ նման, թեկուզև իմպրովիզ բնույթի առաջարկով հանդես գալ հենց Հայաստանում, առավել ևս, երբ նախօրեին դարձյալ շփման գծում զինվոր է զոհվել: Է.Շարմազանովի խոսքերով, այն, որ ադրբեջանցիները նման սադրիչ գործողության են դիմել, երբ ԵԱՀԿ համանախագահներն էին Ղարաբաղում, ևս մեկ կարևոր հանգամանք է` միջազգային հանրությունը պետք է լուրջ ճնշման ենթարկի Ադրբեջանի ղեկավարությանը. «Այլապես բանակցություններն իմաստ չեն կարող ունենալ: Եթե իրենք պատերազմ են ուզում, ինչո՞ւ են գնում բանակցում, երկու-երեք օր խելոք պահում, հետո նորից»,- հետաքրքրվեց Է.Շարմազանովը:
Իսկ եթե պատերազմական ճանապարհով են ուզում լուծել խնդիրը, ապա թող սկսեն. «Տեսնենք այս անգամ ինչքա՞ն շրջան են թողնում, ինչպես որ 90-ականների սկզբին էր, երբ ադրբեջանական կողմը պանիկայի մեջ էր»:
/Panorama.am/
|
