ՀԱՊԿ-ն անհանգստացած է Ադրբեջանի ռազմական բյուջեի մեծացմամբ: Մոսկվայում ընթացող միջազգային համաժողովի ժամանակ հայտարարել է ՀԱՊԿ գլխավոր քարտուղար Նիկոլայ Բորդյուժան, ու հավելել,- «Ադրբեջանի ռազմական բյուջեի անհամաչափ մեծացումը որոշակի տագնապ է հարուցում»:
ՀԱՊԿ գլխավոր քարտուղարի խոսքերով Հայաստանը, որպես ՀԱՊԿ անդամ, կովկասյան տարածաշրջանում ենթարկվում է «անդադար տեղեկատվական ճնշման»:
«Ինտերֆաքս» գործակալության հաղորդմամբ, Բորդյուժան նաև հայտարարել է, որ Թբիլիսիի հակառուսական հիստերիան և Վրաստանի ռազմական պոտենցիալի վերականգնումը Կովկասյան անկայունացնում են իրավիճակը տարածաշրջանում:
«Այս տարածաշրջանում վրացական իշխանությունների դիրքորոշումը չի նպաստում իրավիճակի կայունացմանը` հակառուսական հիստերիայի ահագնացմանն ուղղված նրա գործողությունները և արևմտյան առաջատար երկրների օգնությամբ ռազմական պոտենցիալի վերականգնմանն ուղղված քայլերը»,- մասնավորապես ասել է նա:
Բացի այդ ՀԱՊԿ գլխավոր քարտուղարը հատկանշել է. «Տարածաշրջանում անկայունացնող ազդեցություն ունեն նաև Հյուսիսային Կովկասի հանրապետություններում ծայր առած գործընթացները` Դաղստանում, Ինգուշեթիայում, Կաբարդինո-Բալկարիայում, Կարաչաևո-Չերկեսիայում և Չեչնիայում ծայրահեղականության երևույթների պահպանումը»:
/Panorama.am/
| 
