«Ադրբեջանն արդեն բոլոր սահմաններն անցնում է: Մի կողմից նախագահները բանակցում են ԼՂ հիմնախնդիրը խաղաղ ճանապարհով կարգավորելու ուղղությամբ, մյուս կողմից ադրբեջանցիները այս ամսվա մեջ 3-րդ զինծառայողն են սպանում»,- անդրադառնալով ղարաբաղա-ադրբեջանական զորքերի շփման գծում ադրբեջանցի դիպուկահարների կողմից հայ զինծառայողին սպանելու փաստին՝ Panorama.am-ին ասաց ազատամարտիկ, խորհրդարանի պատգամավոր Կարեն Սարիբեկյանը:
Մարտի 17-ին ժամը 17:30-ի սահմանում ղարաբաղա-ադրբեջանական հակամարտ զորքերի շփման գծի արևելյան (Ասկերանի) պաշտպանական ուղղությամբ տեղակայված դիրքերից մեկում հակառակորդի կողմից արձակված գնդակից հրազենային մահացու վիրավորում է ստացել ՊԲ ժամկետային զինծառայող, 1991թ. ծնված Ահարոն Արմենի Հայրապետյանը: Դեպքից անմիջապես հետո վիրավորը տեղափոխվել է զինվորական հոսպիտալ, որտեղ ժամը 18:59-ին մահացել է:
«Եթե Ադրբեջանը մտածում է, թե մենք չենք կարող իրենց նման ձևով պատասխան հասցնել, լիովին սխալվում են, սակայն մենք չենք կարծում, թե նման նենգ քայլերով կարելի է խնդիր լուծել կամ համաձայնության հասնել»,- նշեց պատգամավորը՝ հավելելով, որ 90-ականների սկզբին հայ մարդու, հայկական բանակի հուժկու հարվածն ադրբեջանցիները պետք է որ մոռացած չլինեն:
Նրա խոսքերով, գազանություններն ադրբեջանցիների համար ապրելակերպ են դարձել, մենթալիտետ, հակառակ դեպքում անհնար է պատերացնել, թե ինչպես են դրանք զինծառայող սպանում, երբ միջադեպից մի քանի ժամ առաջ, նույն շրջանում ռազմագերիների վերադարձման պրոցես էր եղել:
/Panorama.am/
|
